काठमाडौं । प्रधानमन्त्री बालेन्द्र शाहले सरकार जनताको चाहनाअनुसार काम गर्न प्रतिबद्ध रहेको भन्दै आम नागरिकलाई ढुक्क रहन आग्रह गरेका छन्। उनले सामाजिक सञ्जालमार्फत आफ्नो धारणा सार्वजनिक गर्दै वर्षौंदेखि विद्यार्थी र कर्मचारीतन्त्रमा दलगत हस्तक्षेपले प्रणाली कमजोर बनेको बताएका हुन्।
प्रधानमन्त्री शाहका अनुसार धेरै संगठनहरूले विद्यार्थी र कर्मचारीको हितभन्दा बढी राजनीतिक दलका ‘स्लिपर सेल’का रूपमा काम गर्दा योग्यता र क्षमताभन्दा पहुँच र दलगत झुकावलाई प्राथमिकता दिइएको छ। यसले राज्य प्रणालीप्रति जनविश्वास घटाएको उनको भनाइ छ।
बिज्ञापन
उनले शिक्षालय र कर्मचारीतन्त्रलाई दलगत राजनीतिबाट मुक्त गर्ने निर्णय आवश्यक रहेको उल्लेख गर्दै अब शिक्षण संस्थामा दलको झण्डा र कर्मचारीतन्त्रमा दलगत प्रभाव निषेध गरिने स्पष्ट पारे। यसबाट अधिकार खोसिने नभई पेशागत स्वतन्त्रता थप सुदृढ हुने उनको विश्वास छ।
प्रधानमन्त्रीले नियुक्ति, सरुवा र बढुवामा अब दलगत निकटता होइन, विधि, क्षमता र दक्षतालाई आधार बनाइने बताए। विद्यार्थीले राजनीति सिक्दा सभ्य, जिम्मेवार र विचारयुक्त तरिकाले सिक्नुपर्ने तथा कर्मचारीले कुनै दल होइन, जनताको सेवा गर्नुपर्नेमा उनले जोड दिएका छन्।
उनले यो कदम कुनै पार्टीविरुद्ध नभई प्रणाली सुधार र भविष्य सुरक्षित गर्ने प्रयास भएको उल्लेख गरे। जनताको चाहनाअनुसार अध्यादेशमार्फत यस्ता विकृतिहरू हटाइएको भन्दै उनले सबैको साथ र विश्वास आवश्यक रहेको बताएका छन्।
प्रधानमन्त्री शाहले परिवर्तन भाषणले नभई ठोस निर्णयले आउने उल्लेख गर्दै सरकारले गर्ने हरेक काम आम नेपालीको हितमा हुने प्रतिबद्धता व्यक्त गरेका छन्।
मंगलबार, बैशाख २२, २०८३
मंगलबार, बैशाख २२, २०८३
