विराटनगर । लामो समयदेखि रोकिएको जग्गाको कित्ताकाट प्रक्रिया विराटनगर महानगरपालिकामा पुनः सञ्चालन हुने भएको छ । महानगरपालिकाले भू–उपयोग क्षेत्र वर्गीकरणको सम्पूर्ण प्रक्रिया पूरा गरी त्यससम्बन्धी विवरण नापी कार्यालयमा पठाएसँगै जग्गाको कित्ताकाट खुला भएको हो ।
कित्ताकाटका लागि आवश्यक प्रशासनिक तथा प्राविधिक प्रक्रिया पूरा भएपछि महानगर क्षेत्रभित्र रोकिएका जग्गा कारोबारले गति लिने अपेक्षा गरिएको छ । यसले घरजग्गा कारोबारमा संलग्न व्यवसायी, जग्गाधनी तथा सर्वसाधारणलाई ठूलो राहत पुग्ने देखिएको छ ।
विज्ञापन
विराटनगर महानगरपालिकाको नगर कार्यपालिकाको कार्यालयले २०८३ कात्तिक २७ गते नापी कार्यालय विराटनगरलाई पत्र पठाउँदै भू–उपयोग क्षेत्र वर्गीकरणको विवरण तथा अन्तिम प्रतिवेदन कार्यान्वयनका लागि हस्तान्तरण गरेको हो ।
महानगरपालिकामा गठित भू–उपयोग परिषद्बाट स्वीकृत वर्गीकरणका आधार र मापदण्डअनुसार तयार पारिएको विवरण नगर कार्यपालिकाको २०८३ असोज २३ गतेको निर्णयबमोजिम नापी कार्यालयमा पठाइएको हो ।
महानगरपालिकाले १९ वटै वडाको भू–उपयोग क्षेत्र वर्गीकरणसम्बन्धी अन्तिम प्रतिवेदन, विद्युतीय तथ्यांक र आवश्यक विवरणसहितको तथ्यांक भण्डारण प्रणालीसम्बन्धी कागजात नापी तथा भूमि प्रशासन कार्यालयमा बुझाइसकेको छ । आवश्यक विवरण आधिकारिक रूपमा सम्बन्धित कार्यालयमा पुगेपछि कित्ताकाटसम्बन्धी काम अघि बढाउने बाटो खुलेको हो ।
यसअघि भू–उपयोग क्षेत्र वर्गीकरण तथा त्यससँग सम्बन्धित प्रशासनिक प्रक्रिया पूरा हुन नसक्दा विराटनगरमा जग्गाको कित्ताकाट प्रभावित हुँदै आएको थियो । त्यसको प्रत्यक्ष असर घरजग्गा कारोबार, जग्गा किनबेच तथा जग्गाधनीले आफ्नो सम्पत्ति आवश्यकताअनुसार उपयोग गर्ने प्रक्रियामा परेको थियो ।
एक महिनाभित्र भू–सेवा सञ्चालन गर्ने लक्ष्य
कित्ताकाटको प्रक्रिया खुला भएसँगै महानगरपालिकाले जग्गासम्बन्धी सेवालाई थप व्यवस्थित, छिटो र प्रविधिमैत्री बनाउने तयारीसमेत अघि बढाएको छ ।
महानगर प्रमुख नागेश कोइरालाले आगामी एक महिनाभित्र भू–सेवा सञ्चालनमा ल्याउने लक्ष्यसहित आवश्यक तयारी तीव्र पारिएको बताएका छन् । भू–सेवा सञ्चालनमा आएपछि जग्गासम्बन्धी प्रशासनिक कामलाई सहज, पारदर्शी र प्रभावकारी बनाउन सहयोग पुग्ने अपेक्षा गरिएको छ ।
प्रमुख प्रशासकीय अधिकृत विजयकुमार शर्माका अनुसार भू–सेवा सञ्चालनको तयारी प्रारम्भिक चरणमा छ । आवश्यक प्राविधिक तथा प्रशासनिक व्यवस्थापन पूरा गरेर सेवा सञ्चालनमा ल्याउने तयारी भइरहेको छ ।
भू–सेवा प्रणाली कार्यान्वयनमा आएपछि जग्गासम्बन्धी विवरण तथा सेवाप्रवाहलाई प्रविधिमार्फत व्यवस्थित गर्न सहज हुने महानगरपालिकाको अपेक्षा छ ।
कित्ताकाट खुला हुनु र भू–सेवा सञ्चालनको तयारी एकैसाथ अघि बढ्नु विराटनगरको घरजग्गा क्षेत्रका लागि महत्वपूर्ण उपलब्धिका रूपमा हेरिएको छ । लामो समयदेखि प्रभावित जग्गा कारोबारले पुनः गति लिने र सेवाग्राहीले जग्गासम्बन्धी कामका लागि भोग्दै आएको झन्झट कम हुने अपेक्षा गरिएको छ ।
महानगरपालिकाले भू–उपयोग वर्गीकरणको प्रक्रिया पूरा गरेसँगै अब सम्बन्धित कार्यालयबाट कित्ताकाटसम्बन्धी काम प्रभावकारी रूपमा कार्यान्वयन हुनु र घोषित समयसीमाभित्र भू–सेवा सञ्चालनमा आउनु महत्वपूर्ण हुनेछ ।
शुक्रबार, कार्तिक २७, २०८३
मंगलबार, कार्तिक २४, २०८३
