विराटनगर । रोटरी क्लब अफ विराटनगर डाउनटाउनको पहलमा मोरङको झोराहाट क्षेत्रका दलित तथा बाँतर समुदायका घरहरूमा १० वटा ह्याण्डपम्प जडान गरिएको छ। यस परियोजनाको उद्देश्य समुदायका परिवारहरूलाई स्वच्छ पिउने पानी र आधारभूत सरसफाइको सुविधा उपलब्ध गराउनु रहेको क्लबले जनाएको छ।

स्थानीय आवश्यकता र घरहरूको अवस्थालाई ध्यानमा राख्दै ह्याण्डपम्पहरू रणनीतिक रूपमा यस्तो स्थानमा जडान गरिएको छ कि एक ह्याण्डपम्पबाट कम्तीमा दुईदेखि तीन वटा घरपरिवारले लाभ लिन सकून्। यसबाट सीमित स्रोतलाई प्रभावकारी रूपमा प्रयोग गर्दै बढी परिवारलाई स्वच्छ पानी उपलब्ध गराउने लक्ष्य राखिएको छ।

बिज्ञापन

क्लबकी अध्यक्ष रोटेरियन गिरिजा सारडाले यस परियोजना क्लबका लागि निकै महत्वपूर्ण र मन नजिकको भएको बताउनुभयो। उहाँका अनुसार, परियोजनाले समुदायका परिवारहरूलाई पिउने पानी र सरसफाइ जस्ता आधारभूत आवश्यकतामा सहयोग पुर्‍याउने भएकाले यसको विशेष महत्व रहेको छ।

उहाँले ह्याण्डपम्प जडान गर्दा स्थानीय बासिन्दाको अनुमति तथा सहयोग लिएर मात्रै बोरिङ कार्य सम्पन्न गरिएको र पिउन योग्य पानी नआएसम्म बोरिङ गराइएको जानकारी दिनुभयो, ताकि समुदायलाई वास्तवमै उपयोगी र सुरक्षित पानी उपलब्ध गराउन सकियोस्।

कार्यक्रममा क्लबका सदस्यहरू स्नेहा अटल, दीप्ति तोदी, मञ्जु अग्रवाल र सरिता गोल्छा को पनि उपस्थिति रहेको थियो। क्लबले समुदायमा स्वच्छ पानी, स्वास्थ्य तथा सरसफाइसँग सम्बन्धित यस्ता परियोजनाहरू आगामी दिनमा पनि निरन्तर सञ्चालन गर्ने जनाएको छ।

×

❮

❯