विराटनगर । सुनसरीको धरानमा तेजाब(एसिड) सेवन गरेका एक पुरुषको उपचारका क्रममा मृत्यु भएको छ। धरान उपमहानगरपालिका–७ बगैँचा लाइनका करिब ४४ वर्षीय सरोज विकको आइतबार राति निधन भएको जिल्ला प्रहरी कार्यालय सुनसरीका प्रवक्ता डीएसपी योगराज खतिवडाले जानकारी दिए।

डीएसपी खतिवडाका अनुसार, विकले असार २३ गते राति मादक पदार्थ सेवन ९मापसे० गरेको अवस्थामा घरमै राखिएको तेजाब सेवन गरेका थिए। सो तेजाब घरको धारा सफा गर्न राखिएको थियो। तेजाब सेवनलगत्तै उनको अवस्था गम्भीर भएपछि तत्काल धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि लगिएको थियो।

बिज्ञापन

तर, स्वास्थ्य अवस्थामा सुधार नआएपछि उनलाई थप उपचारका लागि विराटनगरको विराट नर्सिङ होम स्थानान्तरण गरिएको थियो। उपचारको क्रममा झण्डै दुई हप्ता बितिसकेको भए पनि स्वास्थ्य अवस्था जटिल रहँदै आएको र अन्ततः आइतबार राति करिब १० बजेतिर उनको मृत्यु भएको प्रहरीले जनाएको छ।

हाल घटनाबारे थप अनुसन्धान भइरहेको प्रहरीले बताएको छ। विकले तेजाब किन र कसरी खाए भन्ने विषयमा विस्तृत विवरण संकलन भइरहेको प्रहरीको भनाइ छ।

×

❮

❯