एसियन हाइवेको लक्ष्मीमार्गमा कालोपत्रे शुरु,कस्तो बन्दै छ काँकडभिट्टा–लौकही खण्ड ?
नोट: यो समाचार ४ महिना अघिको हो
बुधबार, असार ०४, २०८२ |
साँझ ६:११ बजे
विराटनगर । एशियाली मुलुकहरूलाई सडकमार्गबाट जोड्ने उद्देश्यसहित निर्माण थालिएको ‘एसियन हाइवे’ अन्तर्गत काँकडभिट्टा–लौकही खण्डको कालोपत्र कार्य सुरु भएको छ ।
आयोजनाको पश्चिम खण्ड इटहरी कार्यालयका प्रमुख जगत् प्रजापतिको अनुसार, मङ्गलबार लक्ष्मीमार्ग क्षेत्रबाट एक लेन कालोपत्रको काम औपचारिक रूपमा सुरु गरिएको हो । निर्माण सुरु भएको १५ महिनामा करिब २३ प्रतिशत कार्य सम्पन्न भइसकेको उनले बताएका छन् ।
बिज्ञापन
एसियाली राजमार्ग नम्बर २ मा पर्ने काँकडभिट्टादेखि लौकहीसम्मको करिब १२० किलोमिटर सडक स्तरोन्नति गर्ने योजना भए पनि हालसम्म ९५.७६ किलोमिटर क्षेत्रमै काम भइरहेको छ । परियोजना पूर्वी र पश्चिम खण्डमा विभाजन गरी निर्माण भइरहेको छ ।
चालु आर्थिक वर्षमा कम्तिमा १० किलोमिटर खण्ड कालोपत्र गर्ने लक्ष्य लिइएको छ । पूर्वी खण्ड दमक कार्यालयका प्रमुख सुनिलबाबु पन्तका अनुसार सो खण्डमा २१ प्रतिशत काम सम्पन्न भइसकेको छ र चालु वर्षमै १० किलोमिटर कालोपत्र गर्ने योजना छ ।
पूर्वी खण्डमा ५० र पश्चिम खण्डमा ७० वटा कल्भर्ट निर्माण भइसकेका छन् । यस राजमार्गको चौडाइ बजार क्षेत्रमा ५० मिटर, ग्रामीण क्षेत्रमा ३३ मिटर र जङ्गल क्षेत्रमा २४ मिटर रहनेछ ।
एडीबीको ऋण सहयोगमा नेपाल सरकारसँगको साझेदारीमा ३४ अर्ब ९० करोड रुपैयाँमा ठेक्का लागेको छ । त्यस रकममध्ये एसियाली विकास बैँक (एडीबी)को ८४ दशमलब १ प्रतिशत र १५ दशमलब ९ प्रतिशत नेपाल सरकारको लगानी हुनेछ । यो परियोजना २०२४ फेब्रुअरी १ बाट सुरु भएको हो । सन् २०२७ फेब्रुअरी १ मा सम्पन्न गर्ने लक्ष्य छ ।
काकरभिट्टादेखि सुनसरीको लौकहीसम्म सडक, ठूला पुल र कल्भर्टको कामसेत गरी विभिन्न पाँचवटा प्याकेजमा ठेक्का लागेको छ । प्याकेज २, ३ र ५ काँकडभिट्टा–लौकही सडक आयोजनाको पश्चिम खण्ड इटहरीस्थित सडक कार्यालयबाट हुँदै आएको छ ।
प्याकेज १ र ४ काँकडभिट्टादेखि लौकहीसम्मको सडक आयोजना पूर्वी खण्ड सडक कार्यालय दमकले हेर्छ । पूर्वी र पश्चिमसमेत गरी दुई खण्डमा बनिरहेको सकड आयोजना एसियन हाइवेको एउटा भाग हो ।
थाइल्यान्डको बैंककबाट शुरु भएको सडक म्यानमार, बंगलादेश, भारत हुँदै नेपालको पूर्वपश्चिम राजमार्ग भएर नयाँदिल्लीबाट पाकिस्तानको कराँचीसम्म पुग्छ । भारततर्फ पश्चिम बंगाल हुँदै नेपालको काँकडभिट्टा नाकासम्म सडक जोडिइ सकेको छ ।
एसियाली राष्ट्रबीच व्यापार प्रवद्र्धन, आयात निर्यात बढाउन र पर्यटक चलायमान गराउने उद्देश्यसहित सडक निर्माण अघि बढेको हो ।
सोमबार, कार्तिक २४, २०८२
मंगलबार, कार्तिक २५, २०८२
