विराटनगर । भोलि भदौ १२ गते जनैपूर्णिमा तथा रक्षाबन्धन पर्व मनाइँदैछ। पर्वको पूर्वसन्ध्यामा विराटनगर बजारमा राखी, मिठाई तथा पूजाका सामग्री खरिद गर्नेहरूको चहलपहल बढेको छ।

रक्षाबन्धनलाई लक्षित गर्दै विराटनगरका विभिन्न पसल तथा मुख्य बजार क्षेत्रमा रंगीचंगी राखी, मिठाई, फलफूल तथा पूजाका सामग्री बिक्रीका लागि राखिएका छन्। दाजुभाइ तथा दिदीबहिनीका लागि राखी खरिद गर्न आउने ग्राहकका कारण बजारमा विशेष रौनक देखिएको छ।

बिज्ञापन

जनैपूर्णिमा हिन्दू धर्मावलम्बीहरूको महत्वपूर्ण पर्व हो। यस दिन हिन्दू धर्मावलम्बीहरूले विधिपूर्वक स्नान गरी नयाँ जनै धारण गर्ने तथा पुरानो जनै फेर्ने चलन छ। साथै, दिदीबहिनीले दाजुभाइको दीर्घायु, सुख, समृद्धि र स्वास्थ्यको कामना गर्दै हातमा राखी बाँध्ने भएकाले यस पर्वलाई रक्षाबन्धन पनि भनिन्छ।

रक्षाबन्धनका दिन दाजुभाइ तथा दिदीबहिनीबीच आपसी प्रेम, सद्भाव र पारिवारिक सम्बन्धलाई थप प्रगाढ बनाउने विश्वास गरिन्छ। कतिपय समुदायमा पुरोहित वा गुरुजनबाट हातमा रक्षा सूत्र बाँध्ने परम्परासमेत रहेको छ।

पर्वलाई लक्षित गर्दै विराटनगरका मुख्य बजार क्षेत्रमा मानिसहरूको बाक्लो आवतजावत देखिएको छ। बजारमा किनमेल गर्नेहरूको संख्या बढेसँगै व्यापारिक क्षेत्रमा समेत चहलपहल बढेको व्यवसायीहरूले बताएका छन्।

यस वर्षको जनैपूर्णिमा तथा रक्षाबन्धनले पारिवारिक प्रेम, आपसी सद्भाव र सामाजिक एकताको सन्देश दिने अपेक्षा गरिएको छ।

×

❮

❯