विराटनगर । भन्सार विभागले अनधिकृत व्यक्तिको संलग्नता रोक्दै कानुनी रूपमा इजाजतप्राप्त भन्सार एजेन्ट तथा प्रतिनिधिमार्फत मात्र मालवस्तु जाँचपास गराउने निर्देशन दिएपछि विराटनगर भन्सार एजेन्ट संघले त्यसको स्वागत र समर्थन गरेको छ।

​बिहीबार विज्ञप्ति जारी गर्दै संघले भन्सार एजेन्ट महासंघ नेपालको संस्थागत निर्णयलाई प्रभावकारी रूपमा कार्यान्वयन गर्न आफूहरू प्रतिबद्ध रहेको जनाएको छ।

बिज्ञापन

​संघका अध्यक्ष देवकी नन्दन शर्माका अनुसार विभागको यस कदमले भन्सार प्रणालीमा पारदर्शिता, जवाफदेहिता र पेशागत मर्यादा कायम गर्न ठूलो सहयोग पुग्नेछ। “कानुनले भन्सार एजेन्टको अधिकार र दायित्व स्पष्ट तोकेको छ। अनधिकृत व्यक्तिको घुसपैठले पेशागत मर्यादा घट्नुका साथै राजस्व प्रशासन र व्यापार सहजीकरणमा पनि चुनौती थपेको छ,” शर्माले भने। संघले सम्पूर्ण जाँचपास प्रतिनिधिहरूलाई कानुन र आचारसंहिताको पूर्ण पालना गर्न निर्देशन दिएको छ।

​यसैबीच, भन्सार एजेन्ट महासंघ नेपालका सचिव प्रविण जोशीले यो अभियान देशभरका भन्सार एजेन्टहरूको कानुनी पहिचान र मर्यादा जोगाउन सुरु गरिएको बताए। विराटनगर संघको ऐक्यबद्धताले अभियानलाई थप बल पुगेको भन्दै उनले स्थानीय नाकामा देखिने व्यावहारिक समस्या तथा राजस्व असुलीका चुनौतीलाई संवाद र सहकार्यबाटै समाधान गरिने स्पष्ट पारे।

​’कानुनको पालना, पेशागत मर्यादा र संस्थागत एकता नै आधुनिक भन्सार प्रणालीको आधार हो’ भन्दै संघले विभागको निर्णय कार्यान्वयनमा सहयोग पुर्‍याउन सम्बन्धित सबै पक्षसँग अपील समेत गरेको छ।

×

❮

❯