विराटनगर । कोसी सरकारले सदनमा प्रस्तुत गरेको नीति तथा कार्यक्रममा विपक्षी दलले कडा आलोचना र टिप्पणी गरेका छन् ।

सोमबार प्रदेश प्रमुख परशुराम खापुङले प्रदेश सभामा नीति तथा कार्यक्रम प्रस्तुत गरेका थिए । त्यसमाथि मंगलबारबाट छलफल शुरु भएको हो ।
छलफलमा नेकपा माओवादी केन्द्र कोसी प्रदेश संसदीय दलका नेता इन्द्रबहादुर आङ्बोले सरकारको कामप्रति प्रश्न गर्दा मुख थुन्न खोजिएको बताए । विपक्षीले सरकारसँग प्रश्न गर्ने र त्यसको जवाफ सरकारकै तर्फबाट आउनु पर्ने बताउँदै भने, “२०८२ सम्म नै मिलेर खानुहोस् । विपक्षी डराउँछ भन्ने सोच्दै नसोच्नु होला । देखिएका समस्याको प्रश्न उठाएको हो ? के संसद प्रश्न उठाउनै नपाउने ठाउँ हो ? प्रश्न उठाउनेलाई सत्तारुढ दलका सांसद मिलेर मुख थुन्न खोजेको हो ?”

बिज्ञापन

उनले सरकारलाई राम्रो काम गर्न सुझाव दिने तर मुख्यमन्त्री बन्छु भनेर पर्खिएका हरुको जवाफ नखोजेको सुनाए । “संसदले भोलिको सरकार देख्दैन । अहिलेको सरकारले जवाफ दिनुपर्छ । सरकारलाई सोधेको जवाफ सरकारले दिनुपर्छ । पर्खिरहेको मुख्यमन्त्रीले होइन । गम्भीरता पूर्वक सरकारलाई कुरा राख्ने हो,” उनले भने ।

नीति कार्यक्रमले धेरै क्षेत्रलाई समेट्न खोजेको तर सिङ्गो प्रदेशको प्राथमिकता निर्धारण हुन नसकेको टिप्पणी गरे । जीडीपी बढाउने, आर्थिक वृद्धिदर सुधार गर्ने र गरिबी न्युनीकरण गर्ने योजना सरकारसँग नभएको उनले बताए ।

नीति कार्यक्रमले असफल र केही विवादास्पद योजना पनि अघि सारेको बताए । कार्यान्वयन नभएको मुख्यमन्त्री ड्यास बोर्ड र म अघि बढ्छु कार्यक्रम त्यसकै उदाहरण भएको सुनाए । उनले भने,“केचनादेखि सगरमाथासम्म द्रूत मार्ग, रेल र सुरुङ मार्ग पनि कार्यान्वयन नै नहुने योजना हुन ।”

माओवादी केन्द्र प्रमुख सचेतक गीता तिम्सिनाले नीति तथा कार्यक्रममाथि मुख्यमन्त्रीलाई दिइएको सुझाव सरकारले नसमेटेको बताइन् । राप्रपा सांसद प्रेमराज थाम्सुहाङले नीति तथा कार्यक्रमले जनअपेक्षा पूरा गर्ने नदेखेको बताए ।

×

❮

❯