विराटनगर । जेनजी आन्दोलनका क्रममा कोशी प्रदेशका विभिन्न भाटभटेनी स्टोरहरुमा जलेर मर्नेको संख्या पाँच पुगेको छ ।

भदौ २३ र २४ गतेको भएको जेनजी आन्दोलनका क्रममा लुटपाट गर्न भाटभटेनी पसेकाहरु पछि आगो लाग्न थालेपछि निस्कन नसक्दा निस्सासिएर उनीहरुको मृत्यु भएको अनुमान गरिएको छ । तर, उनीहरुको पहिचान भने खुल्न सकेको छैन । आन्दोलन साम्य भएपछि सरसफाइ शुरु गर्ने क्रममा धरानस्थित भाटभटेनी स्टोरमा चार जनाको कंकाल फेला परेको थियो ।

बिज्ञापन

विराटनगरस्थित स्टोरमा हिजो सोमबार एक जनाको कंकाल फेला परेको थियो । आन्दोलनसमेतमा परेर कोसी प्रदेशभर १० जनाको मृत्यु भएको थियो । तीमध्ये पाँच जनाको मात्र पहिचान खुल्न सकेको कोशी प्रदेश प्रहरी कार्यालयले जनाएको छ । आन्दोलनका क्रममा प्रहरीको गोली लागेर मृत्यु भएकाहरुको भने पहिचान खुलेको छ ।

झापाको बिर्तामोडमा अर्जुनधारा नगरपालिका–११ का ३० वर्षीय गोपाल सेढाईं, अर्जुनधारा–८ का ३२ वर्षीय दिनेश राजवंशी र पाँचथरको हिलिहाङका ३० वर्षीय कमल भण्डारीको मृत्यु भएको थियो ।

सुनसरीको इटहरीमा गोली लागेर इटहरी–१६ का २३ वर्षीय अभिषेक श्रेष्ठ र इटहरी–१४ का चंखे भनिने मोहन सरदार रहेको प्रहरीले जनाएको छ ।

झडपका क्रममा प्रदेशभर १ सय १४ जना प्रहरी घाइते भएका थिए । आन्दोलनकारीतर्फ ४६ जना घाइते भएका थिए ।

×

❮

❯