विराटनगर । राधाकृष्णरथयात्रालाई लक्षित गर्दै निर्माणाधीन नयाँ रथमा भक्तजनको सुरक्षालाई ध्यानमा राखी अत्याधुनिक ब्रेक प्रणाली जडान गरिने भएको छ।

मूल समारोह समितिका अध्यक्ष कैलाश रेग्मीका अनुसार, यसपटक बनिरहेको रथ अघिल्ला वर्षहरूभन्दा ठुलो र आकर्षक मात्र होइन, प्रविधिमा समेत उन्नत हुनेछ। “नयाँ निर्माण हुने रथमा सुरक्षित ब्रेक प्रणाली जडान गरिने छ,” उनले बताए।

रेग्मीका अनुसार, अघिल्लो वर्षहरूमा रथ यात्रा क्रममा ब्रेक प्रणालीको अभावले विभिन्न जोखिम हुन सक्ने अवस्था रहँदै आएको थियो। “यसपटक ब्रेक प्रणाली सहितको रथ बनाउने निर्णय गरिएको छ, जसले यात्राको समयमा नियन्त्रण र सुरक्षा सुनिश्चित गर्छ,” उनले स्पष्ट पारे।

रथको तौल, साइज र निर्माणको आधुनिक स्वरूपलाई हेर्दा ब्रेक प्रणालीको आवश्यकता अझ महत्वपूर्ण हुने बताइएको छ।

यो नयाँ प्रयोगले परम्परागत शैलीलाई आधुनिक प्रविधिसँग समायोजन गर्ने प्रयासस्वरूप लिइएको मानिएको छ। अध्यक्ष रेग्मीले भने, “यसपटक हामीले परम्परा र प्रविधिको समायोजन गर्न खोजेका छौं। सुरक्षाको पक्षमा कुनै सम्झौता छैन।”

रथयात्रामा हजारौं भक्तजन सहभागी हुने भएकाले ब्रेक प्रणालीको प्रयोगले दुर्घटनाको सम्भावना न्यून बनाउने अपेक्षा गरिएको छ।

×

❮

❯