महानगरको सरसफाइ व्यवस्थापन शाखा प्रमुख पुनम दाहालका अनुसार, रथयात्राका क्रममा फोहोर फैलिन नदिन पूर्वस्वीकृतिबिना प्लास्टिकका बोतल, गिलास, कप र प्लेट जस्ता सामग्री वितरणमा रोक लगाइनेछ ।
“वातावरणीय सरसफाइमा सहयोग नगर्ने र जथाभावी प्लास्टिकजन्य सामग्री प्रयोग गर्ने व्यक्ति वा संस्थालाई कारबाही गरिनेछ,” दाहालले बताए ।
फोहोर व्यवस्थापनलाई प्रभावकारी बनाउन रथयात्राको दिन महानगरले रथ गुड्ने मार्गमा निःशुल्क सरसफाइ सेवा पनि प्रदान गर्ने भएको छ । यसका लागि आवश्यक सरसफाइ सामग्रीसहित फोहोर संकलन टोली परिचालन गरिनेछ ।
रथयात्रामा जलपान वा अन्य कुनै कार्यक्रम सञ्चालन गर्न चाहने संघसंस्था तथा व्यक्तिले साउन ३० गतेभित्र महानगरपालिकामा आफ्नो कार्यक्रमबारे जानकारी दर्ता गराउनुपर्नेछ । दर्ता भएका स्टलहरूलाई फोहोर व्यवस्थापनमा सहयोग गर्न र प्लास्टिकरहित सामग्री प्रयोग गर्न प्रोत्साहित गरिनेछ ।
महानगरले ‘सफा सहर, हरित सहर’ अभियानलाई सफल बनाउन सबै नगरवासीलाई यस कार्यमा सहयोग गर्न अपिल गरेको छ । अघिल्लो वर्षको अनुभवबाट सिक्दै यस वर्ष अझ प्रभावकारी रणनीति अपनाइने महानगरले जनाएको छ ।
यस पहलले रथयात्रालाई धार्मिक र सांस्कृतिक उत्सवका रूपमा मात्र नभई, स्वच्छता र सामाजिक उत्तरदायित्वको पर्वका रूपमा समेत स्थापित गर्ने लक्ष्य राखिएको छ ।
बुधबार, साउन १४, २०८२
मंगलबार, साउन १३, २०८२
