विराटनगर । निर्माण शुरु भएको झण्डै चालिस वर्षपछि सप्तरी सदरमुकाम राजविराजमा बसपार्क संचालनमा आएको छ । विधिवत् रूपमा हस्तान्तरण भएपछि बसपार्क संचालनमा आएको हो । निर्माण कम्पनीले गत वैशाख २३ गते काम पूरा गरेको थियो । बसपार्क राजविराज नगरपालिकालाई हस्तान्तरण भई सकेको छ ।

बिज्ञापन

गणतन्त्र दिवसको अवसर पारेर काबा नगर प्रमुख इसरत परवीनले बसपार्कको उद्घाटन गरेका छन् ।

बिज्ञापन

१६ करोड ३८ लाख ९६ हजार ५ सय १९ रूपैयाँको लागतमा संघ सरकार मातहतको सघन सहरी तथा भवन निर्माण आयोजना राजविराजमार्फत् सिनर्जी बिल्डर्स कुलेश्वरले स्थानीय राजदेवी चौकमा बसपार्क बनाएको हो ।

२०७४ पुस १९ गते निर्माण सम्झौता भएको थियो । तर, ६ पटक म्याद थप भई बल्ल निर्माण भएको हो ।

२०४४ सालमै पहिलोपटक तत्कालीन प्रधानमन्त्री मरिचमान सिंहले बसपार्क शिलान्यास गरेका थिए । ०४६ मा तत्कालीन अञ्चलाधीश सूर्यबहादुर सेन ओली र ०५२ मा तत्कालीन प्रधानमन्त्री शेरबहादुर देउवाले पनि शिलान्यास गरे ।

चौथो पटक ०७४ मा सहरी विकास मन्त्रालयका सचिव दीपेन्द्रनाथ शर्मा र राजविराज नगरपालिकाका तत्कालीन नगरप्रमुख शम्भुप्रसाद यादवले संयुक्त रूपमा शिलान्यास गरे ।

यसअघि राजविराजमा‌ बसपार्क नहुँदा नगरक्षेत्रमा सवारीसाधनको चापले बजारको ट्राफिक व्यवस्था अस्तव्यस्त हुने गरेको थियो । व्यवस्थित रूपमा पालिकाले बसपार्क सञ्चालन गर्यो भने मात्रै यातायात व्यवस्थापनमा सहज हुनेछ । यसतर्फ नगरपालिका अगाडि बढ्नु जरूरी रहेको नगरबासीको भनाइ छ ।

बसपार्कभित्र टिकट काउन्टरसहित बैंक ब्लक, रेष्टुरेन्ट, डिपार्टमेन्ट स्टोरसमेत सञ्चालन गर्ने भवन बनाइएको छ ।

राजविराज बसपार्क निर्माणमा संघ सरकारको १६ करोड ३८ करोड भन्दा बढी रकम खर्च भएको छ ।
दुई दिनअघि भएको सामान्य वर्षामा बसपार्क भित्र सवारीसाधन पार्किङ गर्ने र यात्रु बस्ने क्षेत्रमा पानी जमेको थियो । जबकी वर्षाको पानी बगाउन बसपार्कभित्र नाला निर्माण भएको छ । तर, ढलान र सडक समथर नहुँदा जमेको पानी नालामा पुग्ने अवस्था थिएन् ।

निर्माण कम्पनीको लापरबाही र काम गराउने सरकारी निकाय सघन सहरीको अनदेखाले बसपार्कमा पानी जम्ने अवस्था आउँदा अविलम्व सच्याउन जरूरी भएको वडाअध्यक्ष अरूण यादवले बताए ।

सघन सहरी आयोजना राजविराजका प्रमुख सुरेन्द्रकुमार साहले वर्षाको पानी व्यवस्थापनका लागि नाला निर्माण गरिएको अवस्थामा पनि पानी जमेको विषय आफूलाई थाहा नभएको बताए ।

×

❮

❯