काठमाडौं । भारतीय जनता पार्टी (भाजपा)का नेता सम्राट चौधरीले बुधबार बिहार राज्यको नयाँ मुख्यमन्त्रीका रूपमा शपथ लिने भएका छन् ।
मंगलबार सत्तारूढ एनडीए गठबन्धनको विधायक दलको नेतामा सर्वसम्मत रूपमा चयन भएपछि उनको शपथ ग्रहणको तयारी गरिएको हो । नेतृत्व परिवर्तनको प्रक्रिया नितिश कुमारले मुख्यमन्त्री पदबाट राजीनामा दिएपछि सुरु भएको हो । उनी हालै मात्र राज्यसभाका सदस्य बनेका छन् र जेडीयूका प्रमुख पनि हुन् ।
बिज्ञापन
गठबन्धनका विधायकहरूको बैठकपछि केन्द्रीय मन्त्री नित्यानन्द रायले चौधरीलाई सर्वसम्मत रूपमा नेता चयन गरिएको जानकारी दिए । बैठकमा सबै गठबन्धनका सदस्यहरूको उपस्थिति रहेको थियो ।
बिहारका मन्त्री रामकृपाल यादवले पनि चौधरीले बुधबार मुख्यमन्त्री पदको शपथ लिने जानकारी दिएका छन् । उक्त बैठकमा नितिश कुमार स्वयं पनि सहभागी थिए ।
बिहारमा लामो समयसम्म मुख्यमन्त्री रहेका नितिश कुमारले मंगलबार राज्यपाल समक्ष आफ्नो राजीनामा बुझाएका थिए, जससँगै उनको करिब दुई दशक लामो शासनकाल समाप्त भएको छ । उनको कार्यकालमा बिहार देशकै तीव्र रूपमा विकास भइरहेका राज्यहरूमध्ये एकका रूपमा स्थापित भएको थियो ।
उनको राजीनामापछि अब सम्राट चौधरीले नयाँ नेतृत्व सम्हाल्ने भएका छन् । हाल ७५ वर्षका नितिश कुमार राज्यसभामा निर्विरोध निर्वाचित भइसकेका छन् र उनको पार्टी जेडीयू एनडीए गठबन्धनकै हिस्सा हो ।
बिहार विधानसभा चुनावमा जेडीयूको राम्रो प्रदर्शनपछि एनडीएले ठूलो जित हासिल गरेको केही महिनामै नेतृत्व परिवर्तन भएको हो ।
राजीनामापछि नितिश कुमारले आफ्नो कार्यकालमा सबै वर्ग र समुदायका लागि समान रूपमा विकासका काम गरिएको बताएका छन् ।
सम्राट चौधरीको नेतृत्वमा भाजपाले बिहारमा पहिलोपटक आफ्नै नेतृत्वमा सरकार सञ्चालन गर्ने अवसर पाउने भएकाले यसलाई महत्वपूर्ण राजनीतिक उपलब्धिका रूपमा हेरिएको छ ।
मंगलबार, बैशाख ०१, २०८३
बुधबार, बैशाख ०२, २०८३
