इलाम । इलामको माङसेबुङ गाउँपालिकामा विषाक्त च्याउ खाँदा एकै वडाका तीन जनाको ज्यान गएको छ ।

बिज्ञापन

बिज्ञापन

माङसेबुङ –५ को स्थानीय चिया बगानमा उम्रिएको च्याउ खाएर बिरामी भएका उनीहरुको उपचारको क्रममा अस्पतालमा मृत्यू भएको हो । बिरामी परेका ५५ वर्षीय अमर लावती, २५ वर्षीया मनिषा लिम्बू र १७ वर्षीया नूमा लावतीको मृत्यु भएको प्रहरीले जनाएको छ ।

गम्भीर बिरामी परेका उनीहरुलाई झापाको बिर्तामोडस्थित बिएनसी अस्पताल भर्ना गरिएको थियो । अस्पतालका सूचना अधिकारी डा. अनुपम घिमिरेका अनुसार ६ दिनअघि उनीहरूले चिया बगानमा भेटिएको जंगली च्याउ घर लगेर पकाएर खाएका थिए। त्यसपछि उनीहरूमा एक्कासि स्वास्थ्य समस्या देखिएको थियो।

बिरामी परेकी मनिषा लिम्बू र नुमा लावती थप उपचारका लागि विराटनगरको विराट नर्सिङ होममा रेफर गरिएको थियो । अमर लावतीको भने उपचारका क्रममा आइतबार बिएनसी अस्पतालमा मृत्यू भएको हो ।

स्थानीय तह र स्वास्थ्य निकायले च्याउ सेवनका जोखिमबारे सचेत रहन र जंगली च्याउ नखान सर्वसाधारणलाई आग्रह गरेका छन्।