विराटनगर । मोरङ प्रहरीले जिल्ला अदालत मोरङको नाम र आकार प्रयोग गरी सर्वसाधारणसँग लाखौं रुपैयाँ ठगी गरेको आरोपमा आमा–छोरीलाई पक्राउ गरेको छ। पक्राउ पर्नेहरू सिराहा, लहान स्थायी घर भई हाल विराटनगर–५ मा बस्दै आएका ५० वर्षीया पुनम देवी साह र उनकी २७ वर्षीया छोरी कोमल कुमारी साह हुन्। ठगीको मुख्य योजनाकार भनिएका कोमलका पतिको नाम सन्जय यादव रहेको प्रहरीले बताएको छ — उनी हाल फरार छन्।

प्रहरीको अनुसन्धान अनुसार सन्जय यादवले पहिले अदालतमा काम गरेको अनुभवको दुरुपयोग गरी मोरङ जिल्ला अदालतको नक्कली लेटरहेड, छाप र परिचयपत्र बनाएको थिए। कोमलले आफूलाई अदालत कर्मचारी प्रस्तुत गरी कार्यालय सहयोगी, खरिदार र नायब सुब्बा जस्ता पदका लागि भर्ना खुल्ला भएको भ्रम फैलाउने गर्थिन् र पदअनुसार शुल्क असुल गर्थिन्। अनुसन्धानले देखाएको अनुसार कार्यालय सहयोगीका लागि रू. २,५७५, खरिदारका लागि रू. ५,५७५ र नायब सुब्बाका लागि रू. ७,५७५ आवेदन शुल्क लिने गरेको खुलेको छ। ग्राहकले तिरेको पैसा पुनमको नाममा रहेको ई–सेवा खातामा जम्मा गराइन्थ्यो जसले वास्तविक स्रोत पहिचान हुन कठिन बनाएको प्रहरीले जनाएको छ।

बिज्ञापन

लामो समयसम्म पनि जागिर नपाएपछि पीडितहरूले अदालत पुगेर सत्य पत्ता लगाउँदा सो पदहरू कुनै पनि रूपमा नखुलेको थाहा पाए। त्यसपछि मोरङका ५० भन्दा बढी पीडितहरूले सामूहिक उजुरी दिएर प्रहरीले अनुसन्धान थालेको हो। उजुरीपछि बनेको अनुसन्धान टोलीले आमा–छोरीलाई विराटनगरबाट पक्राउ गरी जिल्ला अदालत, मोरङमा म्याद थप गरी विस्तृत अनुसन्धान अघि बढाएको डीएसपी कोपिला चुडालले जानकारी दिइन्।

प्रहरीले मुख्य योजनाकार सन्जय यादवको खोजी तीव्र बनाएको र थप पक्राउ पर्न सक्ने संकेत दिएको छ। घटनाबाट ठगेका अरू प्रभावितहरू प्रमाणसहित जिल्ला प्रहरी कार्यालय, मोरङमा सम्पर्क गर्न अनुरोध गरिएको छ। डीएसपी चुडालले यसलाई “सरकारी निकायप्रति भरोसा दुरुपयोग गरेर गरिएको संगठित अपराध” भएको भन्दै कडाभन्दा कडा कारबाही गर्ने जिकिर पनि गरिन्।

×

❮

❯