विराटनगर । अरब सागरमा विकसित मौसमी प्रणालीको कारण हाल देशका विभिन्न स्थानमा भइरहेको वर्षा र हिमपात बुधबारदेखि रोकिने मौसमविद्हरूले जनाएका छन्। तर, विहीबार साँझदेखि बंगालको खाडीमा बनेको ‘मोन्था’ नामक चक्रवातको प्रभावले पुनः मौसम बिग्रिने पूर्वानुमान गरिएको छ।

मौसमविद् उज्जवल उपाध्यायका अनुसार आज रातिसम्म अरब सागरको प्रभाव कमजोर हुँदै जाने र बुधबार अधिकांश स्थानमा घाम लाग्ने सम्भावना छ। बुधबार काठमाडौंसहित धेरै ठाउँमा वर्षा नहुने र केहीबेर घाम लागेर न्यानो महसुस हुने उनले बताए ।

बिज्ञापन

तर, सोही दिन साँझदेखि बंगालको खाडीबाट विकसित मोन्था चक्रवात नेपालको दक्षिणी भूभाग हुँदै प्रवेश गर्ने सम्भावना छ। यसले पर्सा, बारा, रौतहट र सर्लाही हुँदै नेपाल प्रवेश गर्नेछ र तराईका यी जिल्ला सहित बागमती प्रदेशमा पनि तीव्र वर्षा गराउने अनुमान छ। त्रिशूलीको उत्तर र नारायणी नदीको पूर्वी भाग विहीबारको प्रणालीको इपिसेन्टर हुनेछ।

यो प्रणालीका कारण पहाडी तथा हिमाली जिल्लाहरूमा पनि भारी वर्षा र हिमपात हुने देखिएको छ। कर्णालीसम्म मध्यम असर पर्ने र कर्णालीदेखि पश्चिमतर्फ न्यून प्रभाव रहने प्रक्षेपण गरिएको छ।

बिहीबार साँझदेखि शुक्रबार मध्याह्नसम्म इलाम, धनकुटा, संखुवासभा, सोलुखुम्बु, तेह्रथुम, पाँचथर, खोटाङ र झापा जिल्लाहरू उच्च जोखिममा पर्ने मौसमविद्हरूको चेतावनी छ। केही जिल्लामा २०० मिलिमिटरसम्म वर्षा हुनसक्छ। गत असोजमा आएको बाढीपहिरोले इलाममा ३९ जनाको मृत्यु भएको स्मरण गराउँदै उनले जमिन पहिल्यै कमजोर भएकाले सानो वर्षाले पनि ठूलो क्षति गर्न सक्ने चेतावनी दिएका छन्।

पदयात्रा र सडकमा सतर्कता अपनाउन मौसमविदले सुझाव दिएका छन् ।

×

❮

❯