विराटनगर । मोरङको रतुवामाईमा प्रहरीले गोली चलाउँदा दुई भारतीय नागरिक घाइते भएका छन्। लागुऔषध ओसारपसार तथा कारोबारमा संलग्न गिरोहलाई नियन्त्रणमा लिने क्रममा प्रहरीले बिहीबार राति गोली चलाएको हो।

प्रहरीका अनुसार गोली लागेर भारतको अररिया निवासी २२ वर्षीय दीपककुमार बोसाक र ४० वर्षीय पुरन बोसाक घाइते भएका छन्। दुवैको घुँडामुनि गोली लागेको छ। उनीहरूको विराटनगरस्थित कोशी अस्पतालमा उपचार भइरहेको छ।

विज्ञापन

लागुऔषध नियन्त्रण ब्युरो काठमाडौं र विराटनगरबाट खटिएको संयुक्त प्रहरी टोलीले रतुवामाई नगरपालिका–६ शनिश्चरेमा राति करिब ९ः३० बजे चेकजाँच गर्ने क्रममा उनीहरूलाई नियन्त्रणमा लिन खोजेको थियो। प्रहरीलाई देखेपछि भाग्न खोज्नुका साथै प्रहरीमाथि गोली प्रहारको प्रयास भएपछि जवाफी कारबाहीमा आठ राउन्ड गोली चलाइएको मोरङ प्रहरीले जनाएको छ।

घटनामा घाइते दुई भारतीय नागरिकसहित रतुवामाई–१ का ३५ वर्षीय प्रमोद ठाकुरलाई पनि प्रहरीले पक्राउ गरेको छ।

उनीहरूको साथबाट करिब ५०० ग्राम खैरो हेरोइन (ब्राउन सुगर), एक थान होममेड पेस्तोल, एक राउन्ड गोली तथा दुईवटा मोटरसाइकल बरामद भएको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए।

×

❮

❯