काठमाडौं । काठमाडौंको प्रमुख सांस्कृतिक पर्व इन्द्रजात्रा आजदेखि औपचारिक रूपमा सुरु भएको छ। जात्राको सुरुआतसँगै हनुमानढोका दरबार क्षेत्रस्थित कालभैरव अगाडि विधिपूर्वक इन्द्रध्वजसहितको लिंगो ठड्याइएको छ।

इन्द्रजात्राको मुख्य सुरुआती विधिका रूपमा लिंगो ठड्याएपछि जात्राका विभिन्न कार्यक्रम औपचारिक रूपमा अघि बढ्ने परम्परा छ। लिंगो ठड्याउने क्रममा परम्परागत बाजागाजासहित धार्मिक विधिअनुसार पूजा तथा अन्य संस्कार सम्पन्न गरिएको थियो।

विज्ञापन

काठमाडौं उपत्यकाको नेवार समुदायको प्रमुख सांस्कृतिक पर्वका रूपमा मनाइने इन्द्रजात्रामा इन्द्र, भैरव, गणेश र कुमारीको पूजा तथा रथयात्रा गरिन्छ। जात्राका अवसरमा हनुमानढोका दरबार क्षेत्र आसपासमा देवीदेवताका मूर्ति तथा रथको दर्शन गर्न श्रद्धालु र सर्वसाधारणको भीड लाग्ने गर्छ।

जात्राका क्रममा हनुमानढोकाबाट कुमारी, गणेश र भैरवको रथ निकालेर काठमाडौंका विभिन्न टोलमा परिक्रमा गराउने परम्परा छ। यस क्रममा लाखे नाच, पुलुकिसी नाचलगायत विभिन्न सांस्कृतिक प्रस्तुति पनि गरिन्छ।

इन्द्रजात्रा सुरु भएसँगै हनुमानढोका तथा आसपासका क्षेत्रमा चहलपहल बढेको छ। स्थानीयवासीसँगै स्वदेशी तथा विदेशी पर्यटकसमेत जात्राका विभिन्न गतिविधि अवलोकन गर्न बसन्तपुर क्षेत्रमा पुगेका छन्।

×

❮

❯