गण्डकी | भोटेकोशी नदीमा आएको बाढीमा मृत्यु भएकाहरूको शव पहिचान तथा परीक्षणको काम पोखरा स्वास्थ्य विज्ञान प्रतिष्ठानमा सुरु भएको छ ।
नवलपुर, गोरखा, धादिङ र तनहुँमा भेटिएका ९३ शव पोखरा स्वास्थ्य विज्ञान प्रतिष्ठानमा राखिएको छ । त्यस्तै, नौ वटा शव मणिपाल शिक्षण अस्पतालमा राखिएका छन् ।
बिज्ञापन
शव पहिचानका लागि आफन्तलाई अस्पतालमा राखिएको स्क्रिनमार्फत तस्बिर हेर्ने व्यवस्था मिलाइएको छ । बाढीमा बेपत्ता भएका आफन्तको खोजीमा रहेका परिवारका सदस्य अस्पताल पुगेर शव पहिचान गर्ने प्रयास गरिरहेका छन् ।
जिल्ला प्रहरी कार्यालय कास्कीका प्रहरी उपरीक्षक नवीन कार्कीका अनुसार पहिचान भएका शवको परीक्षण गरी कानुनी प्रक्रिया पूरा गरेर आफन्तलाई बुझाइनेछ । पहिचान हुन नसकेका शवको डीएनए परीक्षणका लागि नमुना काठमाडौँ पठाइने उहाँले बताउनुभयो ।
“शवको तस्बिर आफन्तलाई हेर्ने व्यवस्था मिलाएका छौँ । आफन्तले पहिचान गरेपछि कानुनी प्रक्रिया पूरा गरेर शव बुझाउँछौँ,” प्रहरी उपरीक्षक कार्कीले भन्नुभयो, “शव हिलाम्मे भएकाले सफा गरेर मात्र परीक्षण गर्नुपर्ने अवस्था छ ।”
पहिचान हुन नसकेका शवलाई बेवारिसे शव व्यवस्थापनसम्बन्धी निर्देशिकाअनुसार व्यवस्थापन गरिने प्रहरीले जनाएको छ ।
प्रमुख जिल्ला अधिकारी कुमानसिंह गुरुङले शव व्यवस्थापनका लागि पोखराका अन्य अस्पतालसँग पनि समन्वय भइरहेको बताउनुभयो । उहाँका अनुसार धेरै शव भएकाले सबैको पहिचान गरी आफन्तलाई बुझाउन केही दिन लाग्न सक्छ ।
त्रिशूली र नारायणी नदी किनारमा भेटिएका शवलाई सम्बन्धित जिल्लामा राख्न र परीक्षण गर्न ठाउँको अभाव भएपछि पोखरा ल्याइएको हो ।
प्रजिअ गुरुङका अनुसार नवलपुरबाट ४१, धादिङबाट २७, तनहुँबाट १४ र गोरखाबाट ११ शव पहिचान तथा परीक्षणका लागि पोखरा ल्याइएको हो ।
शुक्रबार, भाद्र १२, २०८३
शुक्रबार, भाद्र १२, २०८३
