काठमाडौं। विगत दुई दिनमा इरानका विभिन्न पाँच प्रान्तमा अमेरिकाले गरेको हवाई आक्रमणमा परी कम्तीमा १४ जनाको मृत्यु भएको छ भने ७८ जना घाइते भएका छन्। इरानी स्वास्थ्य मन्त्रालयले बिहीबार यसको पुष्टि गरेको हो।
मन्त्रालयको जनसम्पर्क तथा सूचना केन्द्रका प्रमुख हुसेन केर्मानपुरका अनुसार अमेरिकाले जुलाई ८ र ९ मा इरानका पाँचवटा प्रान्तलाई लक्षित गरी ती तीव्र आक्रमणहरू गरेको थियो। घाइतेमध्ये ४७ जनाको अझै पनि विभिन्न अस्पतालमा उपचार भइरहेको छ भने बाँकीलाई सामान्य उपचारपछि डिस्चार्ज गरिएको छ। आक्रमणबाट विशेष गरी दक्षिणपश्चिमी सहर अहवाजनजिक तीनजनाको मृत्यु भएको जनाइएको छ।
गएको महिना दुई देशबीच भएको युद्धविराम सम्झौता भङ्ग भएसँगै अमेरिका र इरानबीच पुनः सैन्य द्वन्द्व चर्किएको हो। इरानले रणनीतिक रूपमा महत्त्वपूर्ण मानिने होर्मुज जलमार्गमा गइरहेका तीनवटा व्यावसायिक जहाजमाथि आक्रमण गरेको आरोप अमेरिकाले लगाएको थियो। सोही आरोपको जवाफमा वासिङटनले इरानको दक्षिणी तटीय क्षेत्रमा रहेका सैन्य अखडाहरूलाई निसाना बनाउँदै लगातार हवाई आक्रमण सुरु गरेको हो।
बिज्ञापन
अमेरिकी सेन्ट्रल कमान्डका अनुसार अन्तर्राष्ट्रिय जलक्षेत्रमा हुन सक्ने थप सुरक्षा खतरालाई रोक्न दुई दिनको अवधिमा १७० भन्दा बढी स्थानमा आक्रमण गरिएको छ। यस क्रममा इरानको वायुरक्षा प्रणाली, तटीय निगरानी केन्द्र, क्षेप्यास्त्र तथा ड्रोन पूर्वाधार, नौसैनिक क्षमता र इस्लामिक रिभोल्युसनरी गार्ड कर्प्सका सैन्य अड्डाहरूलाई निशाना बनाइएको छ।
यसको प्रतिवाद गर्दै इरानले पनि कुवेत र बहराइनमा रहेका अमेरिकी सैन्य सुविधाहरूलाई लक्षित गरी ड्रोन तथा क्षेप्यास्त्र प्रहार गरेको दाबी गरेको छ।
इरान र अमेरिकाबीचको सैन्य द्वन्द्व अन्त्य गरी स्थायी शान्तिको मार्ग प्रशस्त गर्न गत जुन १७ मा पाकिस्तानको मध्यस्थतामा एउटा महत्वपूर्ण समझदारीपत्रमा हस्ताक्षर भएको थियो। तर, बुधबार अमेरिकी राष्ट्रपति डोनाल्ड ट्रम्पले उक्त समझदारी सकिएको घोषणा गरेसँगै सो सम्झौता औपचारिक रूपमा अन्त्य भएको छ।
यस घोषणाले दुवै देशलाई सैन्य टकरावको एउटा नयाँ र भयानक मोडमा पुर्याएको छ।
बिहिबार, असार २५, २०८३
बिहिबार, असार २५, २०८३
