विराटनगर । मोरङ क्षेत्र नम्बर २ का एमाले उमेदवार दिलिप बगडियाले आफ्नो निर्वाचन कार्यक्रमलाई तीव्रता दिएका छन् । रंगेली नगरपालिकामा निकै राम्रो काम गरेर चर्चामा रहेका उनले आइतबार विभिन्न स्थानीय धार्मिक मठमन्दिरको दर्शन गरेका छन् । बगडियाले आफ्नो निर्वाचन क्षेत्रमा शिवरात्रिको अवसरमा आयोजना गरिएको शिवचर्चामा सहभागिता जनाएका छन् ।
उनी अपरान्ह सुनवर्षी नगरपालिकाको पटियापाडामा आयोजना गरिएको शिवचर्चामा पुगेका थिए । उनले त्यहाँ आफू धार्मिक मन भएको व्यक्ति भएको बताउँदै धार्मिक क्षेत्रको विकासमा सदैवश सक्रिय रहने प्रतिवद्धता जनाए । स्थानीय भक्तजनले दिएको प्रसाद ग्रहण गरे । भेटी चढाए अनि सही उमेदवार चयन गर्न भन्दै विदा भए ।
बिज्ञापन
उनले भने,‘‘म रंगेली नगरपालिकाको मेयर हुँदासमेत धार्मिक क्षेत्रको प्रवर्धन गर्न, मठमन्दिर निर्माण गर्न, जीर्ण धार्मिक क्षेत्रको संरक्षण गर्न सक्रिय थिएँ । म धार्मिक मन भएको मानिस हुँ, तपाइँहरुसँगै संधै यसैगरी हुनेछु ।’’
आइतबार सोही क्षेत्रका कांग्रेस उमेदवार मिनेन्द्र रिजाल पनि चुनावी कार्यक्रममा सक्रिय थिए । उनी पनि सुनवर्षी क्षेत्रमा चुनावी कार्यक्रमहरुमा सहभागी भएका थिए । तर, एमाले उमेदवार बगडिया शिवचर्चामा सहभागी हुँदा रिजाल भने सनवर्षी नगरपालिका वडा नम्बर ९ को मुस्लिम बहुल क्षेत्रमा सक्रिय देखिएका थिए । मस्जिद नजिकै कार्यक्रम आयोजना गरिएको थियो ।
उनले सहिदगञ्जस्थित मुस्लिम टोल पुगेर आफनो घरदैलो कार्यक्रम गरेका थिए । त्यहाँका स्थानीयले चुनावका बेला नेताहरु आउने गरेको तर आफ्नो समुदायको लागि आश्वासन दिने तर काम नगर्ने गरेको गुनासो गरेका थिए । त्यहाँस्थित मस्जिदको घेराबारा गर्नसमेत सहयोग नभएको स्थानीयले बताएका थिए ।
हिन्दी भाषामा भाषण गरेका रिजाललाई स्थानीयले पहिले उनैले जितेर जाँदासमेत काम नगरेको आरोप लगाएका थिए । रिजालले भने जेनजी आन्दोलनका कारण धेरै कुरा अझ बिग्रिएको, कोभिडका कारण खासै काम गर्न नसकेको तर खोप भने उपलब्ध गराएको दाबी गरेका थिए । स्थानीय मुस्लिम अगुवाहरुले भने भोटका बेला नेता मत माग्न आउने र आफूहरुको जनमत लिएर गएपछि फर्किएर नआउने गरेको भन्दै रिजाललाई समेत आरोप लगाएका थिए ।
मतदाताबाट कडा प्रश्न र टिप्पणी आएपछि रिजालले आफूलाई फेरि एक पटक अवसर दिन भन्दै स्थानीय तह, प्रदेश र संघीय सरकारमा कांग्रेस गएपछि काम गर्ने आश्वासन दिएका थिए ।
उता, मोरङ ५ का एमाले उमेदवार मनोज अग्रवाल र जसपाका राजकुमार यादव पनि मठमन्दिर दर्शनमा निस्किएका थिए ।
सोमबार, जेठ ११, २०८३
सोमबार, जेठ ११, २०८३
