काठमाडौं । जेनजी आन्दोलनका क्रममा भदौ २४ गते नेपाल प्रहरीका ४६५ युनिटमा क्षति पुगेकोमा हालसम्म ४४८ वटा सञ्चालनमा आएका छन्। राष्ट्रिय सभाअन्तर्गतको संघीयता सबलीकरण तथा राष्ट्रिय सरोकार समितिमा गृहमन्त्री ओमप्रकाश अर्यालले विवरण प्रस्तुत गर्दै क्षति पुगेका १० जिल्ला प्रशासन कार्यालय र ४ वटा इलाका प्रशासन कार्यालयको सेवालाई सुचारु गरिएको जानकारी दिएका हुन्।

गृहमन्त्री अर्यालले करिब २ महिनाको अवधिमा शान्ति सुरक्षालाई सामान्य अवस्थामा ल्याउन सफल भएको बताए। त्यसैगरी आपराधिक कार्यमा संलग्न ४२९ जनालाई पक्राउ गरी हालसम्म १६८ वटा मुद्दा दर्ता भइसकेको उनले जानकारी दिए।

बिज्ञापन

उनले भने, ʻभदौ २३ र २४ गतेको घटना पश्चात् लुटिएकारहराएका सुरक्षाकर्मीका हतियार मध्ये ७१८ थान सुरक्षाकर्मीको नियन्त्रणमा ल्याइसकिएको छ। र बाँकी हतियार फिर्ता ल्याउन सुरक्षा निकायहरूबाट संयुक्त अपरेसन सञ्चालन गरी खोजी कार्यलाई तीव्र बनाइएको छ।ʼ

गृहमन्त्री अर्यालले भदौ २३ र २४ को घटनामा देशका विभिन्न कारागारबाट कुल १४ हजार ५५४ कैदीबन्दी फरार भएकोमा हालसम्म ९ हजार ५४१ जना फिर्ता ल्याएको जानकारी दिए। यस्तै ५ हजार १३ जना पक्राउ गर्न बाँकी रहेको उनले बताए।

गृहमन्त्री अर्यालले आगामी फागुन २१ मा निर्वाचन सम्पन्न गर्नु वर्तमान सरकारको प्राथमिक जिम्मेवारी रहेको बताए। समयमै निर्वाचन गरेर छिटोभन्दा छिटो जनताबाट निर्वाचित प्रतिनिधिलाई सुम्पन आफूहरू आतुर रहेको उनले बताए।

×

❮

❯