विराटनगर । सुनसरीको रामधुनी नगरपालिका–७ बासबिटीस्थित चतरा–कान्छी चोक भित्री सडकखण्डमा शनिबार साँझ दुई मोटरसाइकल एकआपसमा ठोक्किँदा बाबु–छोरासहित तीन जनाको ज्यान गएको छ भने दुई जना गम्भीर घाइते भएका छन्।

साँझ करिब ७:२० बजे भएको उक्त दुर्घटनामा रामधुनी–६ निवासी ३४ वर्षीय इनर्चन चौधरी, उनका ९ वर्षीय छोरा प्रनिष चौधरी र इनरुवा नगरपालिका–६ का अन्दाजी ५० वर्षीय बिन्दु यादवको ज्यान गएको हो। घाइते अवस्थामै तीनै जनालाई तत्काल धरानस्थित बीपी कोइराला स्वास्थ्य विज्ञान प्रतिष्ठान लगिएको थियो। तर राति ९:२० बजे चिकित्सकले उनीहरूलाई मृत घोषणा गरेका थिए।

बिज्ञापन

दुर्घटनामा परेर इनर्चन चौधरीकी ३२ वर्षीया पत्नी प्रतीक्षा चौधरी र इनरुवा–७ का अन्दाजी ३६ वर्षीय रमेश चौधरी गम्भीर घाइते भएका छन्। उनीहरूको समेत बीपी प्रतिष्ठानमा उपचार भइरहेको प्रहरीले जनाएको छ।

सुनसरी प्रहरीका अनुसार दुर्घटना रामधुनीबाट कालाबञ्जारतर्फ जाँदै गरेको को ३३ प ९६०५ नम्बरको मोटरसाइकल र कान्छी चोकतर्फ आउँदै गरेको प्रदेश १–०२–०५६ प ५८६४ नम्बरको मोटरसाइकल एकआपसमा तीव्र गतिमा ठोक्किँदा भएको प्रारम्भिक अनुसन्धानले देखाएको छ।

दुबै मोटरसाइकल पूर्ण रूपमा क्षतिग्रस्त भएका छन् भने इलाका प्रहरी कार्यालय पकलीका इन्स्पेक्टर लेखनाथ दाहालको टोलीले घटनाको थप अनुसन्धान गरिरहेको छ।

×

❮

❯