विराटनगर । विराटनगर बजार क्षेत्रमा वृद्ध र असहाय व्यक्तिलाई लक्षित गर्दै चोरी गर्दै आएको भारतीय महिलाहरूको गिरोह पक्राउ परेको छ।

जिल्ला प्रहरी कार्यालय मोरङको टोलीले विशेष सूचनाका आधारमा उनीहरूलाई कटहरी गाउँपालिका–१, बुधहाटबाट पक्राउ गरेको हो।

बिज्ञापन

पक्राउ पर्नेहरूमा भारत, पूर्णियाकी २४ वर्षीया प्रियंका धामी, २५ वर्षीया बिहोला धामी र २० वर्षीया अटकारी धामी छन्। उनीहरू सार्वजनिक सवारी (सिटी सफारी) प्रयोग गरी यात्राको बहानामा चोरी गर्दै आएको प्रहरीले जनाएको छ।

२०७९ असार १२ गते दिउँसो सिटी सफारीमार्फत बिराटनगरबाट कटहरी जाँदै गरेका उनीहरूलाई शंका लागेपछि प्रहरीले रोकजाँच गरेको थियो। सो क्रममा उनीहरूको साथबाट १/१ गड्डी १००० दरका नोट फेला परे, जसको कुल रकम ३ लाख रुपैयाँ थियो।

प्रारम्भिक अनुसन्धानका क्रममा ती महिलाहरूले सिटी सफारीमै सवार कटहरी–४ निवासी ७० वर्षीय नारायण प्रसाद काफ्लेको झोलाबाट बैंकबाट झिकेको नगद चोरी गरेको खुलेको छ। काफ्ले घातक रोगका बिरामी भई उपचारपछि घर फर्किंदै थिए।

ती महिलाहरूलाई चोरी मुद्दामा आवश्यक अनुसन्धानका लागि जिल्ला अदालत मोरङबाट म्याद थप गराई अनुसन्धान जारी रहेको प्रहरीले जानकारी दिएको छ।

×

❮

❯