काठमाडौं । सेयर बजार बिहीबार लगातर तेस्रो दिन पनि घटेको छ । नेप्से सूचक बिहीबार २४.५९ विन्दुले घटेर २६२९.०८ अंकमा आएको छ । यसअघिका २ दिनमा पनि बजार घटेको थियो । बिहीबार ११ अर्ब २३ करोड रुपैयाँभन्दा बढीको कारोबार भएको छ । नेप्से सूचक घटे पनि विगत केही दिनको तुलनामा सेयर कारोबार रकम बढेको हो ।
एउटा कम्पनी सकारात्मक सर्किट लेबलमा र ३ वटा कम्पनी नकारात्मक लेबलमा कारोबार भएका छन् । यस दिन सूचीकृत सबै समूहमा गिरावट आएको छ । पछिल्लो समय सेयर बजारलाई नकारात्मक असर पार्ने विषयहरु खासै नदेखिएपनि लगानीकर्ताको आत्मविश्वास बढ्न सकेको देखिँदैन ।
बिज्ञापन
खासगरी बजारमा अधिक तरलताको स्थिति छ भने बजारलाई प्रत्यक्ष प्रभाव पार्ने ब्याजदर अहिले निकै सस्तो छ । अहिले नीतिगत विषयहरु पनि निकै सहज बन्दै गएका छन् । यद्दपि, लगानीकर्ताको लगानी निर्णयमा यी पक्षहरुले मात्र प्रभाव हुँदैन । सूचीकृत कम्पनीको वित्तीय विवरण र उनीहरुले वितरण गर्न सक्ने लाभांश पनि लगानीकर्ताका लागि प्रमुख चासोको विषय हुने गर्छ ।
असार मसान्त नजिकिँदै गएकाले कम्पनीहरुको वर्षभरीको वित्तीय अवस्थालाई लगानीकर्ताहरुले पर्खिरहेको देखिन्छ । विगतमा पनि सूचीकृत कम्पनीहरुको लाभांश क्षमतामा निकै ह्रास आएका कारण अहिले कम्पनीहरुको अवस्था कस्तो छ भन्ने विषय लगानीकर्ताको चासोमा परेको छ । यसले पनि बजारलाई नकारात्मक प्रभाव पारेको विश्लेषण गरिएको छ ।
यस दिन ३ सय १४ कम्पनीको २ करोड ९४ लाखभन्दा बढी कित्ता सेयर कारोबार भएको छ । ८५ करोड रुपैयाभन्दा बढीसहित कारोबार रकममा ङादी ग्रुप पावर अग्रस्थानमा आएको छ । यसैगरी, दोस्रो र तेस्रो स्थानमा क्रमशः बुटवल पावर कम्पनी र सिंगटी हाइड्रो इनर्जी परेका छन् ।
आइतबार, जेठ १७, २०८३
आइतबार, जेठ १७, २०८३
