अहमदाबाद । गुजरातमा भएको एयर इंडिया विमान दुर्घटनाप्रति कम्पनीका अध्यक्ष एन. चंद्रशेखरनले गहिरो दुःख व्यक्त गरेका छन्।

उनको आधिकारिक वक्तव्य टाटा ग्रुपले आफ्नो एक्स (पूर्व ट्विटर) खातामार्फत सार्वजनिक गरेको हो। एयर इंडिया हाल टाटा ग्रुपअन्तर्गत सञ्चालनमा रहेको छ।

बिज्ञापन

टाटा ग्रुपले एक्समा लेखेको छ, “अत्यन्त दुःखका साथ म यो पुष्टि गर्छु कि अहमदाबादबाट लन्डन (ग्याटविक) जाँदै गरेको एयर इंडियाको फ्लाइट संख्या 171 आज दुर्घटनाग्रस्त भएको छ। यस भयावह दुर्घटनाबाट प्रभावित सबै परिवार र आफन्तप्रति हाम्रो गहिरो समवेदना प्रकट गर्दछौं।”

चंद्रशेखरनले भनेका छन्, “हाल हाम्रो प्रमुख प्राथमिकता भनेको सबै पीडितहरू र उनीहरूका परिवारलाई आवश्यक सहयोग प्रदान गर्नु हो।

घटनास्थलमा खटिएका आपतकालीन टोलीहरूसँग सहकार्य गर्दै हामीले प्रभावितहरूलाई आवश्यक सबै प्रकारको सहायता उपलब्ध गराउन प्रयास गरिरहेका छौं।”

उनले थप बताएका छन्, “हामीसँग थप प्रमाणिक जानकारी आएपछि आवश्यक अद्यावधिक जानकारी सार्वजनिक गरिनेछ। अहिले एक आपतकालीन सहायता केन्द्र सक्रिय गरिएको छ र प्रभावित परिवारहरूलाई आवश्यक जानकारी तथा सहयोग दिनका लागि विशेष सहयोग टोली गठन गरिएको छ।”

एयर इंडिया तथा टाटा ग्रुपले दुर्घटनाबाट पीडित यात्रुहरू र उनीहरूका आफन्तहरूलाई राहत र सहयोग पुर्‍याउन हरसम्भव प्रयास जारी राखेको जनाइएको छ।

×

❮

❯