विराटनगर । त्रिभुवन विश्वविद्यालयको आंगिक क्याम्पस महेन्द्र मोरङ आदर्श बहुमुखी क्याम्पसले विद्यार्थी अनुशासन र पोशाक सम्बन्धी नियमलाई थप कडा बनाएको छ। क्याम्पसको बीबीए र बीबीएम कार्यक्रममा अध्ययनरत विद्यार्थीहरूलाई लक्षित गर्दै प्रशासनले नयाँ निर्देशन जारी गरेको हो।

कार्यक्रम निर्देशक मोहन कुमार श्रेष्ठद्वारा जारी गरिएको सूचना अनुसार २०८३ असार १८ गतेदेखि लागू हुने गरी सबै विद्यार्थीले अनिवार्य रूपमा क्याम्पसले तोकेको पोशाक (ड्रेस कोड) लगाउनुपर्नेछ।

बिज्ञापन

पोशाकका साथै यस पटक क्याम्पसले छात्र विद्यार्थीहरूको कपालको लम्बाइलाई लिएर पनि विशेष नियम ल्याएको छ। सूचनामा छात्रहरूलाई आफ्नो कपाल छोटो बनाउन (काट्न) निर्देशन दिइएको छ। यदि कसैले यो नियम उल्लंघन गरेमा क्याम्पस प्रशासनले आवश्यक कारबाही प्रक्रिया अघि बढाउने चेतावनी समेत दिएको छ।

क्याम्पस प्रशासनको यो कदमले विद्यार्थीहरूमाझ अनुशासन र मर्यादित शैक्षिक वातावरण कायम गर्न सघाउने भन्दै कतिपयले यसको समर्थन गरेका छन्। अर्कोतर्फ, स्नातक (कलेज) तहका विद्यार्थीहरूका लागि कपालको लम्बाइ तोक्नु कत्तिको व्यावहारिक र सान्दर्भिक छ भन्दै सामाजिक सञ्जालमा यस विषयलाई लिएर तीव्र बहस र छलफल सुरु भएको छ।

×

❮

❯