काठमाडौं । अमेरिकी राष्ट्रपति डोनाल्ड ट्रम्पले इरानविरुद्ध सञ्चालन भइरहेको सैन्य अभियानलाई क्रमशः घटाउने सम्भावनाबारे विचार भइरहेको बताएका छन्। पश्चिम एसियामा इजरायल र इरानबीच आक्रमण तीव्र बन्दै गएको र क्षेत्रीय तनाव चुलिँदै गइरहेका बेला उनको यस्तो प्रतिक्रिया आएको हो।
सामाजिक सञ्जालमार्फत ट्रम्पले अमेरिकाले आफ्ना अधिकांश सैन्य उद्देश्य हासिल गरिसकेको दाबी गरेका छन्। उनका अनुसार अमेरिकाको लक्ष्य इरानको मिसाइल क्षमता नष्ट गर्ने, रक्षा संरचना कमजोर बनाउने र उसलाई परमाणु क्षमता विकास गर्नबाट रोक्ने थियो।
बिज्ञापन
अबको चरणमा युद्धलाई क्रमशः अन्त्यतर्फ लैजान सकिने संकेत उनले दिएका छन्।
यसैबीच, पछिल्लो समय घटनाक्रमले नयाँ मोड लिएको छ। इजरायलले इरानको एक महत्त्वपूर्ण ग्यास फिल्डमा आक्रमण गरेपछि स्थिति झन् जटिल बनेको छ। यसको प्रत्युत्तरमा इरानले कतारमा रहेको विश्वकै ठूलो एलएनजी प्लान्टलाई निशाना बनाएको छ। यसले अन्तर्राष्ट्रिय बजारमा असर पार्दै तेल तथा ग्यासको मूल्य तीव्र रूपमा बढाएको छ।
इरानसँगको संघर्षमा ट्रम्प प्रशासनका मुख्य लक्ष्यहरूमा मिसाइल प्रणाली पूर्ण रूपमा निष्क्रिय पार्ने, रक्षा उद्योगलाई कमजोर बनाउने, वायु तथा नौसैनिक शक्ति ध्वस्त पार्ने, परमाणु हतियार विकास रोक्ने र साउदी अरब, संयुक्त अरब इमिरेट्सलगायतका सहयोगी राष्ट्रहरूको सुरक्षा सुनिश्चित गर्ने समावेश छन्।
युद्धका बीच क्षति पनि बढिरहेको छ। इरानको जवाफी कारबाहीमा एक अमेरिकी एफ–३५ लडाकु विमानमा क्षति पुगेको जनाइएको छ, यद्यपि चालक सुरक्षित रहेको बताइएको छ। साथै, ऊर्जा आपूर्ति संकटलाई मध्यनजर गर्दै अमेरिकाले समुद्रमा अड्किएका इरानी तेल ट्यांकरहरूलाई अस्थायी राहत दिने निर्णय पनि गरेको छ।
ट्रम्पको अभिव्यक्तिले अमेरिका युद्ध लम्ब्याउने पक्षमा नरहेको संकेत गरे पनि वास्तविक अवस्था अझै तनावपूर्ण छ। इरान र इजरायलबीच आक्रमण जारी छन् र परिस्थिति जुनसुकै बेला थप जटिल बन्न सक्ने देखिन्छ। कूटनीतिक प्रयासले समाधान निकाल्छ कि द्वन्द्व अझ गहिरिन्छ, त्यो भने अझै अनिश्चित छ।
शुक्रबार, चैत्र ०६, २०८२
शुक्रबार, चैत्र ०६, २०८२
