विराटनगर । विराटनगरको मानगढ खानेपानी उपभोक्ता संस्थाको नयाँ नेतृत्व चयन गर्न मतदान जारी छ । अपरान्ह ३ बजे सम्ममा कूल ३२५९ मत खसेको निर्वाचन समितिले जनाएको छ ।

बिज्ञापन

विराटनगर–१ पुष्पलाल चोकस्थित पूर्वाञ्चल विश्वविद्यालयको जनता क्याम्पसमा जारी मतदानको समय बेलुका ५ बजेसम्म तोकिएको छ । नेतृत्वमा पुग्न तीनवटा प्यानल चुनावी मैदानमा छन् ।

बिज्ञापन

अध्यक्ष पदमा रामबहादुर घिमिरे, लालमणि भट्टराई र दुर्गा चापागाईँ प्यान बनाएर उठेका छन् । भट्टराई र घिमिरे नेकपा एमालेका तर्फबाट उम्मेदवार बनेका हुन । यसैगरी चापागाईँ नेपाली कांग्रेसको समर्थित उम्मेदवार हुन् ।

नयाँ नेतृत्व छान्न पछिल्लो पटक २०८१ जेठ १९ मा मतदान भएको थियो । तर, निर्वाचन प्रक्रियाको विषयमा मुद्दा परेपछि उच्च अदालत विराटनगरले पुन: मतदान गर्नुपर्ने फैसला गरेको थियो ।

निर्वाचन अधिकृत अधिवक्ता रुकमिणा नेपालले बताएअनुसार समितिको नेतृत्व छान्न ५ हजार ९८८ उपभोक्ता मतदाता छन् । मतदान स्थलमा १२ वटा बुथ राखेर मत खसाउने प्रबन्ध गरिएको छ ।