बिर्तामोड । झापाको बिर्तामोडमा पौडी खेल्ने क्रममा स्वीमिङ पुलमा डुबेर एक युवकको ज्यान गएको छ। बिर्तामोड नगरपालिका–३ निवासी ३३ वर्षीय प्रकाश प्रसाईंको मृत्यु भएको हो।

प्रहरीका अनुसार घटना बिर्तामोड–२ मा जीवन ढुंगानाले सञ्चालन गर्दै आएको ग्रीन पार्क कम्पाउण्डभित्रको स्वीमिङ पुलमा भएको हो।

बिज्ञापन

जिल्ला प्रहरी कार्यालय झापाका प्रवक्ता डीएसपी खगेन्द्रबहादुर खड्काका अनुसार शुक्रबार दिउँसो करिब ३ बजेतिर प्रकाश प्रसाईं र बिर्तामोड–१० का ३३ वर्षीय केशव शिवाकोटी पार्क घुम्न गएका थिए। त्यही क्रममा उनीहरू पौडी खेल्न पुलमा पसेका थिए।

पौडी खेल्दै गर्दा प्रसाईं डुबेका थिए र घटनाको जानकारी स्वीमिङ पुल सञ्चालकले साँझ करिब ८ बजे मात्रै प्रहरीलाई गराएका थिए, जसलाई ढिलो सूचना दिएको भन्दै प्रहरीले संज्ञानमा लिएको छ।

डीएसपी खड्काका अनुसार घटनाबारे विस्तृत अनुसन्धान भइरहेको छ। स्वीमिङ पुल सञ्चालकसँग सोधपुछ सुरु गरिएको छ। अनुसन्धानपछि कुन स्तरको लापरबाहीका कारण घटना भएको भन्ने स्पष्ट हुने प्रहरीले जनाएको छ।

प्रहरीका अनुसार पछिल्लो समय मुलुकका विभिन्न स्थानमा स्वीमिङ पुलमा डुबेर ज्यान जाने घटनाहरू बढिरहेका छन्। सुरक्षाका पर्याप्त उपाय नहुनु, तालिम प्राप्त लाइफगार्डको अभाव र आपतकालीन उद्धार प्रणालीको कमजोरीले यस्तो अवस्था सिर्जना हुने गरेको जनाइएको छ।

×

❮

❯