भिषण बाढीले पाकिस्तानमा गाउँ नै बग्यो, ३३७ जनाको मृत्यु
सोमबार, भाद्र ०२, २०८२ |
बिहान १०:२३ बजे
कराँची ।जलवायु परिवर्तनको असरस्वरूप आएको आकस्मिक बाढीले उत्तरपश्चिमी पाकिस्तानमा कम्तीमा ३३७ जनाको मृत्यु भएको छ। राष्ट्रिय विपद् व्यवस्थापन प्राधिकरण (NDMA) का अनुसार, बाढीपछिको खोजी कार्य जारी छ भने दर्जनौं मानिस अझै बेपत्ता छन्।
किष्टवार जिल्लाको दुर्गम गाउँ चिसोटीमा आइतबार समेत उद्धारकर्मीहरूको टोली उद्दारमा खटिएको थियो। त्यहाँ कम्तीमा ६० जनाको ज्यान गएको छ भने करिब १५० जना घाइते भएका छन्, जसमा करिब ५० जनाको अवस्था गम्भीर छ।
बिज्ञापन
खैबर पख्तूनख्वा प्रान्तको पहाडी जिल्ला बुनरमा शुक्रबार आएको भीषण वर्षा र बादल फाटेर आएको बाढीले ठूलो क्षति पुर्याएको छ। आपत्कालीन सेवा प्रवक्ता मोहम्मद सुहेलका अनुसार, लामो प्रयासपछि ५४ शव फेला पारिएका छन्। उनले भने, “धेरैजसो गाउँले अझै बेपत्ता छन्।”
पानीको ठूलो भेल पहाडबाट बग्दै आउँदा विशाल ढुंगाहरू घरहरूमा ठोक्किँदा विस्फोटजस्तै आवाज आएको थियो। धेरै घरहरू पूरै ध्वस्त भएका छन्।
सरकारले आगामी मंगलबारसम्म अझै बढी वर्षा र पहिरोको सम्भावनाबारे चेतावनी दिएको छ र स्थानीय प्रशासनलाई सतर्क रहन आग्रह गरेको छ। जुन २६ यता अस्वाभाविक रूपमा बढेको मनसुन वर्षाले पाकिस्तानभरि ६०० भन्दा बढीको मृत्यु भइसकेको छ।
पछिल्ला दिनमा भारतीय प्रशासित कश्मीरमा पनि बादल फाटेर ठूलो क्षति पुगेको छ। शुक्रबार एक हिमाली गाउँमा आएको बाढीले कम्तीमा ६० जनाको ज्यान लिएको छ र धेरैलाई बगाएको छ। चिसोटीमा १०० भन्दा बढी तीर्थयात्रीहरू भएको अस्थायी भान्साघर पूर्ण रूपमा बगाएको भारतीय प्रशासित कश्मीरका मुख्यमन्त्री ओमर अब्दुल्लाले जानकारी दिएका छन्।
शनिबार राति कठुआ जिल्लाका दुई गाउँमा आएको आकस्मिक बाढीले कम्तीमा सात जनाको ज्यान लिएको छ भने पाँच जना घाइते भएका छन्।
एक नातेदारका अनुसार, विवाहका लागि जम्मा भएका २८ जना परिवारका सदस्यको ज्यान गएको छ।
हैदरले थपे, “सरकारी अधिकारीहरूका अनुसार सडकहरू सफा गर्न हप्तौं लाग्नेछ र त्यसपछि मात्रै मर्मत कार्य सुरु गर्न सकिन्छ। पूर्वाधारमा व्यापक क्षति भएको छ र आगामी दिनमा अझै आँधी र वर्षाको चेतावनी दिइएको छ।”
संयुक्त राष्ट्रसंघको समवेदना
संयुक्त राष्ट्रसंघ महासचिव एन्टोनियो गुटेरेसको कार्यालयले आइतबार वक्तव्य जारी गर्दै भारत र पाकिस्तानमा हालै आएको बाढीमा ज्यान गुमाएकाहरूप्रति गहिरो दुःख व्यक्त गरेको छ।
गुटेरेसका प्रवक्ता स्टेफन दुजारिकले भने, “महासचिव पीडित परिवारप्रति समवेदना प्रकट गर्न चाहनुहुन्छ र विपद्को शिकार भएकाहरूप्रति ऐक्यबद्धता जनाउनुहुन्छ।” साथै, “संयुक्त राष्ट्रको देश टोलीहरू सरकारलाई आवश्यक सहयोग दिन तयार छन्।”
बुनर जिल्लाका बासिन्दाहरूले भारी वर्षा र बादल फाटेर आएको बाढीबारे पूर्व चेतावनी नदिएकोमा अधिकारीहरूप्रति आक्रोश व्यक्त गरेका छन्। परम्परागत रूपमा प्रयोग हुने मस्जिदको लाउडस्पिकरबाट कुनै सूचना नआएको उनीहरूको गुनासो छ।
पिर बाबा गाउँका शिक्षक मोहम्मद इकबालले एपी समाचार संस्थालाई भने, “यदि समयमै सूचना दिइएको भए, मान्छेहरू सुरक्षित स्थानमा जान सक्थे र धेरैको ज्यान जोगिन्थ्यो। अहिले बाँचेकाहरू केही पनि नलिएर ज्यान बचाएर भागेका छन्।”
सरकारले भने यद्यपि प्रारम्भिक चेतावनी प्रणाली अस्तित्वमा थियो, तर बुनरमा आएको वर्षा यति तीव्र र अप्रत्याशित थियो कि सतर्कता दिनुअघि नै बाढी आइपुग्यो।
NDMA का अध्यक्ष लेफ्टिनेन्ट जनरल इनाम हैदर मलिकले इस्लामाबादमा पत्रकार सम्मेलन गर्दै भने, “जलवायु परिवर्तनका कारण पाकिस्तानमा मौसमको स्वरूप परिवर्तन भइरहेको छ। यस वर्षको मनसुन सिजनमा पाकिस्तानले गत वर्षको तुलनामा ५० प्रतिशत बढी वर्षा भोगिसकेको छ।”
प्रान्तीय विपद् व्यवस्थापन प्राधिकरणका महानिर्देशक असफन्द यार खान खट्टकका अनुसार, “विश्वमा कुनै पनि मौसम पूर्वानुमान प्रणाली यस्तो बादल फाट्ने घटना कहिले र कहाँ हुन्छ भन्ने निश्चित गर्न सक्दैन।”
विपद् व्यवस्थापन अधिकारी इद्रीस महसुदका अनुसार, पाकिस्तानको प्रारम्भिक चेतावनी प्रणालीले उपग्रह तस्वीर र मौसम विवरणको माध्यमबाट सूचना संकलन गरेर स्थानीय प्रशासन, मिडिया र समुदाय नेताहरू मार्फत् प्रसारण गर्दछ। अघिल्लो समयमा जसले केवल नदीहरू बढाउँथे, अहिले ती वर्षाहरूले शहरी क्षेत्रमा समेत डुबान ल्याउने गरेका छन्।
जलवायु परिवर्तनको असर गहिरिँदै
विशेषज्ञहरूका अनुसार, जलवायु परिवर्तनले दक्षिण एसियामा यस्ता चरम मौसमका घटनाहरूको आवृत्ति र तीव्रता बढाएको छ। पाकिस्तानले विश्वका हरितगृह ग्यास उत्सर्जनमा १ प्रतिशतभन्दा पनि कम योगदान दिए तापनि, उष्णता लहर, भारी वर्षा, हिमनदी विस्फोट र बादल फाट्ने जस्ता घटनाले स्थानीय समुदायहरूलाई गम्भीर असर पुर्याइरहेका छन्।
सोमबार, भाद्र ०२, २०८२
सोमबार, भाद्र ०२, २०८२
