विराटनगर । साउन महिनाको सुरुआतसँगै हरियो चुरा, पोते, मेहेन्दी र हरियो पहिरनप्रतिको आकर्षण झनै बढेको छ। विशेषगरी विवाहित महिलाहरू र किशोरीहरूका लागि यो महिना धार्मिक आस्था, सांस्कृतिक मान्यता र सौन्दर्यको प्रतीकको रूपमा मनाइने भएकाले बजारमा यस्ता सामग्रीको माग उल्लेखनीय रूपमा वृद्धि भएको छ।
विराटनगरसहित काठमाडौं उपत्यकाका ठमेल,असन,इन्द्रचोक, न्युरोड, माइतीघर लगायतका बजारहरूमा साउनको सुरुवातसँगै महिलाहरूको भिड बढ्दै गएको छ। बजारमा हरियो र पहेँलो चुरा, माला, पोते, मेहेन्दी जस्ता सामग्री किन्न आउने महिलाहरूको चहलपहलले साउन महिना विशेष बनाएको देखिन्छ। सौन्दर्य प्रशाधन केन्द्र (ब्युटीपार्लर) मा पुगेर मेहेन्दी लगाउनेको चहलपहल पनि उत्तिकै बढेको देखिन्छ ।
बिज्ञापन
धार्मिक रूपमा साउन महिना भगवान शिवको प्रिय महिना मानिन्छ। यही कारण महिलाहरू साउनभर व्रत बस्ने, सोमबार शिवजीको पूजा गर्ने, हरियो र पहेँलो रंगका कपडा तथा गहना प्रयोग गर्ने गर्छन्। विशेषतः सोमबारका दिनहरूमा हरियो चुरा र मेहेन्दी लगाउने चलनले बजारमा रौनक थपेको छ।
विराटनगरका सौन्दर्य सामग्री विक्रेताहरूका अनुसार साउन सुरु भएसँगै बिक्रीमा उल्लेखनीय वृद्धि भएको छ। “हरेक दिन सयौँ महिलाहरू मेहेन्दी लगाउन आउँछन्,” विराटनगरका स्थानीय व्यवसायीले निकेश साहले बताए। साथीभाइ मिलेर सामूहिक रूपमा मेहेन्दी लगाउने चलन पनि बढ्दो छ, जसले सामाजिक आत्मीयता र रमाइलोपन थपेको छ।
साउन महिनामा प्रयोग गरिने चुरा, पोते, मेहेन्दी मात्र फेसन होइन, आस्था र सांस्कृतिक परम्परासँग पनि जोडिएको हुन्छ। विशेष गरेर विवाहित महिलाहरू आफ्ना श्रीमानको दीर्घायु र सुस्वास्थ्यको कामनाका साथ व्रत बस्ने र पूजापाठ गर्ने परम्परा पालन गर्छन्।
यसरी, साउन महिना नेपाली महिलाहरूका लागि श्रद्धा, सौन्दर्य र संस्कृति मिसिएको विशेष अवसरका रूपमा मनाइन्छ। बजारको चहलपहलले पनि त्यसैको प्रतिविम्ब प्रस्तुत गरिरहेको छ।
आइतबार, चैत्र २२, २०८२
आइतबार, चैत्र २२, २०८२
