विराटनगर । सुनसरीको इटहरीस्थित यातायात व्यवस्था कार्यालयका प्रमुख सतिस सत्याल काममा कैफियत गरेको आरोपमा मन्त्रालयमा फिर्ता तानिएका छन् ।
सत्यालले सवारी चालक अनुमतिपत्र लिन स्वास्थ्य परीक्षण गर्दा अनुत्तीर्णलाई उत्तीर्ण गराएको पाइएको हो । आन्तरिक मामिला मन्त्रालयलका सचिव आस्मान तामाङको नेतृत्वको टोलीले गरेको अनुगमनका क्रममा अनुत्तीर्णलाई उत्तीर्ण गराएको पाइएको हो ।
बिज्ञापन
स्वास्थ्य परीक्षणमा फेल भएकाहरूलाई पास गराएको पाइएपछि सत्याललाई कारबाही स्वरूप मन्त्रालय तानिएको आन्तरिक मामिला तथा कानुन मन्त्री इन्द्रमणि पराजुलीले जानकारी दिए । उनले भने,”लिखित र मौखिक रूपमा गुनासो आएपछि मन्त्रालयबाट अनुगमन भएको हो ।”यसबारे थप अनुसन्धान भइरहेको मन्त्री पराजुलीले बताए ।
यातायात व्यवस्था कार्यालयमा स्वास्थ्य जाँचका विषयमा सेवा ग्राहीसँग आर्थिक लाभ लिने गरेको गुनासो समेत आएको र यस विषयमा गम्भीर रुपमा कदम चालिएको मन्त्री पराजुलीले जानकारी दिए ।
गत साउन महिनाबाट मन्त्रालय आफैले स्वास्थ्य परीक्षण गर्न चिकित्सक नियुक्त गर्ने व्यवस्था भएको थियो ।
सत्यालले यातायात व्यवस्था कार्यालयमा स्वास्थ्य परीक्षणको समस्या पुरानै र दीर्घकालीन भएको भन्दै त्यसलाई सुधार गर्न लाग्दा आफूविरुद्ध आरोप लगाइएको बताएका छन्। सेवा ग्राहीलाई असहज नहोस् भन्ने उद्देश्यले आफूले पुनः परीक्षण (री-चेक) गर्न सुझाव दिने गरेको उनले स्पष्ट पारे।
उनका अनुसार स्वास्थ्य परीक्षणमा असफल भएका सेवाग्राहीहरू प्रायः उनीकहाँ आउने गर्थे र उनीहरूलाई पुनः जाँच गरिदिनु भन्ने आधारमा आफूलाई आरोप लगाइएको हो।
उनले आफूले कुनै पनि प्रकारको आर्थिक लाभ नलिएको दाबी गर्दै छानबिनबाट वास्तविकता बाहिर आउने विश्वास व्यक्त गरे।
आइतबार, चैत्र १५, २०८२
आइतबार, चैत्र १५, २०८२
