विराटनगर। विराटनगरमा ऐतिहासिक राधाकृष्ण रथयात्राको तयारी भइरहँदा शंकास्पद गतिविधिमा संलग्न रहेका पाँच जना व्यक्तिलाई प्रहरीले आइतबार दिउँसो नियन्त्रणमा लिएको छ।

मोरङ प्रहरी प्रवक्ता डीएसपी कोपिला चुँडालका अनुसार पक्राउ पर्नेमा २ महिला र ३ पुरुष छन्, जसको सबैजना भारतीय नागरिक हुन्। उनीहरूलाई विराटनगरको सेन्ट्रल मल नजिकबाट ३ जना र महेन्द्रचोकबाट २ जनालाई नियन्त्रणमा लिइएको हो।

विज्ञापन

“रथयात्राको भीडमा चोरी वा पकेटमारी गर्न आएका हुनसक्ने आशंका छ,” प्रहरी स्रोतले जनाएको छ। हाल उनीहरूलाई जिल्ला प्रहरी कार्यालय मोरङमा राखेर सोधपुछ भइरहेको छ।

रथयात्रालाई लक्षित गर्दै विराटनगरमा सुरक्षा व्यवस्था कडा पारिएको छ। ड्रोन, सीसीटीभी जस्ता प्रविधिको प्रयोग गरी निगरानी बढाइएको र सादा पोसाकसहित ठूलो संख्यामा सुरक्षाकर्मी परिचालन गरिएको डीएसपी चुँडालले जानकारी दिइन्।

सुरक्षा निकायले श्रद्धालुहरूलाई रथयात्रामा सहभागी हुँदा बहुमूल्य गरगहना नलगाउन र शंकास्पद गतिविधि देखिएमा तत्काल प्रहरीलाई जानकारी दिन अनुरोध गरेको छ।

रथयात्राको सुरक्षा सुनिश्चित गर्न नेपाल प्रहरी र सशस्त्र प्रहरी बलको ठूलो संख्यामा तैनाथी गरिएको प्रशासनले जनाएको छ।

×

❮

❯