पूर्णिया विमानस्थल बिहारको चौथो नागरिक विमानस्थल हुनेछ, जुन पटना, गया र दरभंगापछिको विकल्पका रूपमा विकास गरिएको हो।
यस विमानस्थलको सुरुवाती चरणमा इन्डिगो एयरलाइन्स ले पूर्णिया–दिल्ली नियमित उडान सेवा सुरु गर्ने तयारी गरेको छ। यसले कोसी र सीमांचल क्षेत्रलाई देशको राजधानीसँग प्रत्यक्ष रुपमा जोड्नेछ।
यो विमानस्थल न केवल पूर्णिया जिल्लाका बासिन्दा, तर पश्चिम बंगाल, झारखण्ड र नेपालका यात्रुहरूका लागि समेत उपयोगी हुने बताइएको छ।
यहाँको रनवे पूर्वी भारतकै सबैभन्दा लामोमध्ये एक हो, जसको लम्बाइ ३,३५३ मिटर (११,००० फिट) र चौडाइ १५० फिट रहेको छ। यो रनवे हाल भारतीय वायुसेनाको अधीनमा छ र ठूला जहाजहरूको आवागमनका लागि उपयुक्त मानिएको छ।
विमानस्थल निर्माणले स्थानीय जनताको लामो समयदेखिको माग पूरा गर्नुका साथै, क्षेत्रीय कनेक्टिविटीमा उल्लेखनीय सुधार ल्याउने अपेक्षा गरिएको छ। स्टार न्युजले लेखेको छ ।
भविष्यमा अन्य प्रमुख सहरहरूसँग पनि हवाई सेवा विस्तार गरिने योजना छ, जसले यातायात प्रणालीलाई सुलभ मात्र होइन, क्षेत्रीय आर्थिक गतिविधिमा समेत टेवा पुर्याउनेछ।
विराटनगरलाई फाइदा
पूर्णिया विराटनगर-भारत सीमाबाट ९० किलोमिटर मात्र टाढा छ ।
जोगबनीबाट एक घन्टाको यात्रामा पुग्न सकिन्छ । दिल्ली सहित भारतका अन्य ठूला सहर पुग्न नेपालीले पनि फाइदा लिन सक्छन् ।
अहिले पूर्वी नेपालका नेपाली पश्चिम बङ्गालको बागडोग्रा विमानस्थल भएर भारतीय राज्य पुग्ने गरेका छन्। पूर्णियासम्म जोगबनीबाट भारु.१५ मा लोकल रेल चढेर पनि पुग्न सकिन्छ ।
बुधबार, आश्विन ०८, २०८२
बुधबार, आश्विन ०८, २०८२
