काठमाडौं । सेयर बजार सूचक पुनः २६ सयको मनोवैज्ञानिक विन्दुभन्दा तल झरेको छ । नेप्से सूचक आइतबार ३२.१६ विन्दुले घटेर २५९६.७४ अंकमा आएको छ ।

करिब ३ महिनापछि नेप्से सूचक २६ सय विन्दुभन्दा तल बन्द भएको हो । आइतबार ९ अर्ब १३ करोड रुपैयाँभन्दा बढीको कारोबार भएको छ । नेप्से सूचकसँगै कारोबार रकम पनि घटेको हो ।

बिज्ञापन

एउटा कम्पनी सकारात्मक सर्किट लेबलमा र अर्को एक कम्पनी नकारात्मक सर्किट लेबलमा कारोबार भएका छन् । यस दिन सूचीकृत सबै समूहमा गिरावट आएको छ । पहिलेदेखि नै कमजोर अवस्थामा रहेको सेयर बजारमा असार मसान्त नजिकिँदै जाँदा थप दबाब परेको छ । चालु आर्थिक वर्षको अन्तिम महिना भएका कारण लगानीकर्ता केही निष्कृय बनेका छन् ।

मसान्त नजिकिँदै जाँदा लगानीकर्ताहरुलाई बैंकको साँवा ब्याज भुक्तानीको दबाब पर्ने भएकाले बजारमा बिक्रीचाप गर्ने गर्दछ । यता, आगामी आर्थिक वर्षको मौद्रिक नीति र सूचीकृत कम्पनीको वित्तीय विवरण पनि लगानीकर्ताको पर्खाइमा छ । जसका कारण लगानीकर्ताहरु सेयर खरिद तर्फ आकर्षित हुन नसकेको विश्लेषण गरिएको छ ।

यद्दपि, घट्दो बजारमा भाउ सस्तो हुने भएकाले यसलाई सेयर खरिदका लागि आवसरको रुपमा पनि लिन सकिन्छ ।

यस दिन ३ सय १० कम्पनीको २ करोड १५ लाखभन्दा बढी कित्ता सेयर कारोबार भएको छ । ७५ करोड रुपैयाँभन्दा बढीसहित कारोबार रकममा दोर्दी खोला जलविद्युत कम्पनी अग्रस्थानमा आएको छ ।

यसैगरी, दोस्रो र तेस्रो स्थानमा क्रमशः राधी विद्युत र बुटवल पावर कम्पनी परेका छन् ।

×

❮

❯