विराटनगर । दिल्ली पब्लिक स्कुल (डीपीएस), विराटनगरमा श्रीकृष्ण जन्माष्टमीको अवसरमा विशेष धार्मिक तथा सांस्कृतिक कार्यक्रम सम्पन्न भएको छ। विद्यालयको अडिटोरियम हल तथा खेलमैदानमा आज आयोजित कार्यक्रममा विद्यार्थीहरूले भगवान् श्रीकृष्णको जीवन, आदर्श तथा उहाँका शिक्षासँग सम्बन्धित विभिन्न प्रस्तुति प्रस्तुत गरेका थिए।

कार्यक्रमको औपचारिक सुरुवात विद्यालयका प्रधानाध्यापक टी.एन. भण्डारीले दीप प्रज्वलन गरी गर्नुभएको थियो। विद्यालयका Activity Coordinator सौरभ कुमार राउतको संयोजनमा सम्पन्न कार्यक्रममा विद्यार्थीहरूले उत्साहपूर्वक सहभागिता जनाएका थिए।

विज्ञापन

कार्यक्रममा विद्यार्थीहरूले श्रीकृष्ण जन्माष्टमीसँग सम्बन्धित नृत्य, नाटक तथा सांस्कृतिक प्रस्तुतिहरू प्रस्तुत गर्दै भगवान् श्रीकृष्णका जीवनका विभिन्न प्रसङ्गलाई कलात्मक रूपमा प्रस्तुत गरेका थिए। विशेषगरी श्रीकृष्णको बाल्यकाल, उहाँसँग सम्बन्धित धार्मिक प्रसङ्ग तथा सत्य, धर्म, कर्तव्य, प्रेम र सदाचारका सन्देशलाई विद्यार्थीहरूले नृत्य तथा नाटकमार्फत जीवन्त बनाएका थिए।

कार्यक्रमको अर्को आकर्षणका रूपमा विद्यार्थीहरूले मट्का फोड प्रदर्शन समेत गरेका थिए। परम्परागत धार्मिक तथा सांस्कृतिक महत्व बोकेको उक्त प्रस्तुतिले कार्यक्रमलाई थप आकर्षक र उल्लासमय बनाएको थियो।

विद्यालयले यस्ता धार्मिक तथा सांस्कृतिक कार्यक्रममार्फत विद्यार्थीहरूलाई नेपाली मौलिक संस्कृति, परम्परा र धार्मिक मूल्य–मान्यतासँग परिचित गराउनुका साथै नैतिकता, अनुशासन र असल संस्कारको विकास गर्ने उद्देश्य राखेको जनाएको छ।

श्रीकृष्ण जन्माष्टमी केवल धार्मिक पर्व मात्र नभई सत्य, धर्म, कर्तव्य र सदाचारको मार्गमा अघि बढ्न प्रेरणा दिने पर्वका रूपमा समेत लिइन्छ। कार्यक्रममा प्रस्तुत गरिएका विभिन्न गतिविधिले विद्यार्थीहरूलाई भगवान् श्रीकृष्णले देखाउनुभएको मार्ग र उहाँका शिक्षालाई आफ्नो दैनिक जीवनमा आत्मसात् गर्दै सकारात्मक सोच, असल आचरण र जिम्मेवार व्यवहार विकास गर्न प्रेरित गरेको थियो।

विद्यार्थीहरूको सिर्जनशीलता, कला तथा प्रस्तुतिको उत्कृष्ट प्रदर्शनसँगै सम्पन्न कार्यक्रमले विद्यालयमा धार्मिक तथा सांस्कृतिक वातावरण सिर्जना गरेको थियो। डीपीएस विराटनगरले अध्ययनसँगै संस्कार, संस्कृति र नैतिक शिक्षालाई समेत प्राथमिकता दिँदै विद्यार्थीहरूको सर्वाङ्गीण विकासमा यस्ता कार्यक्रमलाई निरन्तरता दिँदै आएको जनाएको छ।

×

❮

❯