विराटनगर । नेपाली कांग्रेसका केन्द्रीय सदस्य तथा कोसी प्रदेशसभा सदस्य अमृत अर्यालले आफूले गरेको एउटा कामको विषयमा पछुतो भएको बताएका छन् । कन्ट्रोभर्सी र प्रतिबद्ध नभएको जमातमा बस्दा त्यस्तो भएको उनले बताए ।
विराटनगरमा आयोजित एक कार्यक्रममा बोल्दै उनले आफूले राजनीतिक जीवनमा धेरै काम गरेको सुनाए । तर, विगतमा आफूले गरेको काममा पनि पश्चात्ताप रहेको सुनाए । राजनीतिक जीवनमा धेरै काम गरेपनि कांग्रेसको पहिलो कोसी प्रदेश अधिवेशनमा गुरु घिमिरेलाई हराएर उद्बव थापालाई जिताएको विषयले अहिले पछुतो भएको बताए ।
आफू दुई पटक मोरङ काँग्रेसको सभापति भएको, दुई पटक केन्द्रीय सदस्य र दुई पटक माननीय भएको भन्दै अहिले रिग्रेट फिल भएको कार्यक्रममै बताए । त्यो कार्यक्रममा कांग्रेस नेता डा. शेखर कोइराला पनि सहभागी थिए । यसअघि अर्याल कोइराला समूहमा थिए । अहिले पुनः फर्किएको बताइन्छ ।
सोही चर्चाकाबीच उनले विराटनगरको राजनीतिक कल्चरमा हुर्किएको राजनीतिकर्मी भएको हुँदा आफू अर्को राजनीतिक कल्चरमा जाँदा फरक अनुभव भएको पनि सुनाए । प्रदेश सांसदको रूपमा अढाई वर्ष अवधि पार गर्दा संसदमा बोल्न पनि नसकेको अर्यालको भनाइ थियो ।
उनले कोशी प्रदेश सरकारमा र प्रदेशसभामा काँग्रेसले डिमोरलाइज भएर काम गर्नु परिरहेको पनि कार्यक्रममा बताए । कांग्रेसले प्रदेशको नामकरणमा पनि एमालेको निर्णयमा भोट हाल्न बाध्य भएको सुनाए ।
‘दलका नेता उद्धवजीलाई हामीले प्रस्ताव गरौँ । कि जातीय पहिचानको पक्षमा उभिनु पर्यो कि कोशीको पक्षमा उभिनु पर्यो भनेको थिएँ । तर, पछि एमालेले गरेको निर्णयमा भोट हाल्यौँ । यस्तो कन्ट्रोभर्सी, प्रतिबद्ध नभएको जमातमा बस्दा मलाई हीनताबोध पनि भएको छ,’ अर्यालले भने ।
*** समाप्त ***
बिहिबार, जेठ १५, २०८२
