काठमाडौं । अमेरिकी राष्ट्रपति सहभागी रात्रिभोज कार्यक्रममा भएको गोलीकाण्डको सम्बन्ध इरान–अमेरिका युद्धसँग जोडिएको हुन सक्ने अमेरिकी गृह सुरक्षा विभागले जनाएको छ ।
विभागको प्रारम्भिक मूल्यांकनअनुसार आक्रमणकारीले इरानसँगको अमेरिका–इजरायल तनावबाट प्रभावित भएर राष्ट्रपति तथा उनका प्रशासनका वरिष्ठ अधिकारीहरूलाई निशाना बनाउने प्रयास गरेका थिए ।
बिज्ञापन
देशभरका कानुन कार्यान्वयन निकाय र संघीय एजेन्सीहरूलाई पठाइएको गुप्तचर प्रतिवेदनमा ३१ वर्षीय आक्रमणकारी सामाजिक तथा राजनीतिक असन्तुष्टिबाट प्रभावित रहेको उल्लेख गरिएको छ । गृह सुरक्षा विभागको खुफिया तथा विश्लेषण कार्यालयले अप्रिल २७ मा तयार पारेको प्रतिवेदनमा उनका सामाजिक सञ्जाल सामग्रीमा अमेरिकी सैन्य कारबाहीप्रति कडा आलोचना गरिएको पाइएको जनाइएको छ ।
प्रतिवेदनअनुसार इरान–अमेरिका युद्धप्रति आक्रोशका कारण उनले उक्त हमला गरेको निष्कर्ष निकालिएको छ । यद्यपि अमेरिकी गृह सुरक्षा विभाग, न्याय विभाग तथा सङ्घीय अनुसन्धान निकायले यसबारे औपचारिक प्रतिक्रिया दिन अस्वीकार गरेका छन् ।
गत अप्रिल २५ मा आयोजित वार्षिक ह्वाइट हाउस संवाददाता रात्रिभोज कार्यक्रममा आक्रमणकारीले गोली चलाएका थिए । सुरक्षाकर्मीहरूले राष्ट्रपतिसम्म पुग्नुअघि नै उनलाई नियन्त्रणमा लिएका थिए । घटनामा एक जना गोप्य सुरक्षा निकायका सुरक्षाकर्मी घाइते भएका थिए ।
उक्त कार्यक्रममा करिब दुई हजार ५०० पाहुना सहभागी रहेका थिए । गोली चलेपछि कार्यक्रममा भागदौड र त्रासको अवस्था सिर्जना भएको थियो । धेरै पाहुनाहरू टेबुलमुनि लुकेर ज्यान जोगाउन सफल भएका थिए ।
घटनापछि सुरक्षाकर्मीहरूले राष्ट्रपति, प्रथम महिला, उपराष्ट्रपति लगायत उच्च अधिकारीहरूलाई सुरक्षित स्थानमा पुर्याएका थिए ।
बुधबार, बैशाख २३, २०८३
बिहिबार, बैशाख २४, २०८३
