विराटनगर । विराटनगर महानगरपालिका–८ हाटखोलास्थित जिल्ला कारागार मोरङमा एक बन्दीको मृत्यु भएको छ।

कारागारका जेलर गौरव ढुंगेलका अनुसार मोरङको सुन्दरहरैंचा नगरपालिका–७ निवासी ३२ वर्षीय गोपाल भनिने जितप्रसाद सापकोटाको निधन भएको हो। उनी लागुऔषध सम्बन्धी मुद्दाका बन्दी रहेका थिए।

बिज्ञापन

असोज २७ गते राति अचानक शरीर सुन्निने र सास फेर्न गाह्रो हुने समस्या देखिएपछि सापकोटालाई विराटनगरस्थित कोशी अस्पतालमा भर्ना गरिएको थियो। स्वास्थ्य अवस्था बिग्रिँदै गएपछि अस्पतालले कात्तिक ६ गते राति उनलाई थप उपचारका लागि रेफर गरेको थियो।

पछि सापकोटालाई विराटनगरकै नोबेल शिक्षण अस्पतालमा सारिएको थियो। त्यहाँ उपचारका क्रममा शुक्रबार राति करिब ९ बजे उनको मृत्यु भएको जेलर ढुंगेलले जानकारी दिए। चिकित्सकका अनुसार उनको फोक्सोमा पानी जमेको र कलेजो पूर्णरूपमा क्षतिग्रस्त भएकाले बचाउन नसकिएको हो।

लागुऔषध मुद्दाका प्रतिवादी सापकोटालाई जिल्ला अदालत मोरङले गत साउन १२ गते थुनामा राखी पुर्पक्षका लागि आदेश दिएको थियो। सो आदेशपछि उनलाई जिल्ला कारागार मोरङमा राखिएको थियो।

सापकोटाको मुद्दा अदालतमा विचाराधीन रहँदै गर्दा उनको मृत्यु भएको हो। मृतकको शव परिवारले जिम्मा लिएर लगेको जेलर ढुंगेलले बताए।

हाल जिल्ला कारागार मोरङमा १ हजार १ सय ८७ जना कैदीबन्दी रहेका छन्, जसमा १ हजार ७५ जना पुरुष र १ सय १२ जना महिला छन्।

×

❮

❯