काठमाडौं । नेपाल प्रिमियर लिग (एनपीएल) को तेस्रो संस्करणमा सुदूरपश्चिम रोयल्सले पहिलो जित दर्ता गरेको छ। बुधबार कीर्तिपुरस्थित त्रिवि क्रिकेट रंगशालामा भएको खेलमा सुदूरपश्चिमले पोखरा एभेन्जर्सलाई ६ विकेटले पराजित गरेको हो।
पोखराले दिएको १४६ रनको लक्ष्य सुदूरपश्चिमले १६.५ ओभरमा चार विकेट गुमाउँदै पूरा गर्यो। यस जितसँगै सुदूरपश्चिमले प्रतियोगिताको अंकतालिकामा दुई अंक जोडेको छ।
विज्ञापन
लगातार दुवै संस्करणको उपविजेता बनेको सुदूरपश्चिमले यसअघि प्रतियोगिताको उद्घाटन खेलमा लुम्बिनी लायन्ससँग सात विकेटको हार बेहोरेको थियो।
सुदूरपश्चिमको जितमा कप्तान दीपेन्द्रसिंह ऐरीले उत्कृष्ट प्रदर्शन गरे। उनले ३६ बलमा चार चौका र दुई छक्काको मद्दतले ५१ रन बनाउँदै अर्धशतकीय इनिङ खेले। त्यस्तै, इशान पाण्डेले ३७ रनको योगदान दिए।
ब्रान्डन म्याकमुलेनले २२ तथा ओपनर सैफ जैबले १६ रन बनाए। पावरप्लेमै ब्रान्डन र अर्का ओपनर विनोद भण्डारी आउट भएपछि दबाबमा परेको सुदूरपश्चिमलाई दीपेन्द्र र इशानको साझेदारीले खेलमा फर्काएको थियो। यी दुईले ६.३ ओभरदेखि १५.३ ओभरसम्म ७४ रनको महत्त्वपूर्ण साझेदारी गरे।
यसअघि टस हारेर पहिले ब्याटिङ गरेको पोखरा एभेन्जर्सले निर्धारित २० ओभरमा सात विकेट गुमाउँदै १४५ रन बनाएको थियो।
पोखराका लागि अर्जुन घर्तीले सर्वाधिक ४० रन बनाए। उनले २५ बलमा चार चौका र एक छक्का प्रहार गरे। ओपनर मेहदी हसनले ३२ रन जोड्दा कप्तान कुशल भुर्तेलले २१ रन बनाए।
त्यस्तै, साकिब अल हसनले १४ तथा धनन्जय लक्ष्मणले ११ रनको योगदान दिए।
सुदूरपश्चिमका बलर अनिल खरेलले उत्कृष्ट बलिङ गर्दै तीन विकेट लिए। उनले तीन ओभरमा २३ रन खर्चिए। हेमन्त धामी, स्कट कुगेलेइन र कप्तान दीपेन्द्रसिंह ऐरीले समान एक–एक विकेट हात पारे।
पोखराले दिएको लक्ष्य सहजै पूरा गरेपछि सुदूरपश्चिमले प्रतियोगितामा आफ्नो जितको खाता खोलेको छ।
बुधबार, कार्तिक १२, २०८३
बुधबार, कार्तिक १२, २०८३
