विराटनगर । मोरङको निर्वाचन क्षेत्र नं २ को डायनिया बजारमा सबै राजनीतिक दलका निर्वाचन क्षेत्रीय समितिका कार्यालय छन् ।
बाटो दक्षिणतिर कांग्रेस र त्यसको ठ्याक्कै उत्तरपट्टी रास्वपाको कार्यालय छ । एमाले र नेकपाको कार्यालय आसपासमै खोलिएका छन् । ती कार्यालयमा कार्यकर्ताको भिडभाड देखिन्छ ।
बिज्ञापन
सोमबारदेखि राजनीतिक दलको चुनावी प्रचार अभियान शुरु भएको छ । धेरै उमेदवारहरु कोणसभा र घरदैलोमा व्यस्त छन् । अपरान्ह रास्वपा कार्यालयमा क्षेत्रीय समितिका पदाधिकारीसहित नगर समितिका पदाधिकारी तथा कार्यकर्ताहरु एउटा छलफलमा सहभागी थिए ।
उनीहरु अन्य दलको भन्दा फरक चुनावी रणनीतिको तयारी गरिरहेका थिए । त्यत्तिकैमा सुनवर्षी नगरपालिकाका रास्वपा कार्यबाहक सभापति चन्द्र पाण्डेले आफ्ना कुरा राख्न शुरु गरे । ‘‘हामीले ग्रामीण भेगमा एउटा सम्पर्क कार्यालय खोल्न सकेका छैनौं, कुर्सी छैनन् टेन्ट छैन कसरी चुनावी अभियान चलाउने,’’ उनले भने,‘‘यसरी त गाह्रो भयो कम्तिमा कार्यकर्ता र समर्थकहरु आएर बस्ने ठाउँ चाहियो । उमेदवार कता हुनुहुन्छ, के गरिरहनु भएको छ ? हामीलाई सोध्छन् तर हामीले के भन्ने ?’’ पाण्डेले घरदैलो र गाउँस्तरीय सभा आयोजना गर्न पनि सम्पर्क कार्यालयहरु चाहिने माग गरे ।
रास्वपाकी स्थानीय नेतृ कमलादेवी दासको पनि त्यस्तै गुनासो थियो । रास्वपाका समर्थक र कार्यकर्ता आएर बस्ने ठाउँ नहुँदा चुनावी अभियानमा कठिनाई भईरहेको बताइन । उनले भनिन्,‘‘कम्तिमा उमेदवार आएर बस्ने र भेटघाट गर्ने ठाउँ त चाहियो नी ।’’
सामाजिक सञ्जालमा निकै चर्चामा रहेको र धेरै लाइक्स तथा कमेन्ट पाउने गरेको नयाँ दल रास्वपाको ग्रामीण भेगहरुमा कार्यालयसहिको उपस्थिति भने हुन नसकेको कार्यकर्ताले नै गुनासो गरिरहेका छन् । मोरङ क्षेत्र नम्बर २ मा पनि रास्वपाको त्यस्तै अवस्थाबारे डायनियाको छलफलमा स्थानीय नेतृत्वले क्षेत्रीय समितिको ध्यानाकर्षण गराएका थिए ।
छलफलमा पार्टीका जिल्ला सदस्य दुर्गाप्रसाद रेग्मीले सम्पर्क कार्यालय र व्यवस्थापानबारे काम अघि बढाउने तयारी रहेको भन्दै नेतृत्वलाई सम्झाउने प्रयास गरे । उनले भने,‘‘हामीले यसको व्यवस्थापनको लागि सहयोग गर्नेहरुबाट समेत व्यवस्थापन गर्ने र त्यो हुन नसके माथिबाट सहयोग लिने योजना बनाएका छौं ।’’
उनले आफूहरु फरक ढंगले अघि बढ्न मतदाता शिक्षा लिएर गाउँटोल छिर्नुपर्ने बताए । उनले पार्टीका वरिष्ठ नेता ‘बालेन्द्र शाह ‘बालेन्द्र’ लाई मुख्य चोकमा ल्याएर १० मिनेट मात्र घुमाउन सकियो भने त्यसको ठूलो काम गर्ने’ भन्दै नेतृत्व र कार्यकर्तालाई सम्झाउने प्रयास गरिरहेका थिए ।
मोरङ २ मा कांग्रेसबाट डा. मिनेन्द्र रिजाल, एमालेबाट दिलिप बगडिया, नेकपाबाट चन्द्रवीर राई र रास्वपाबाट कृष्ण कार्की मुख्य प्रतिस्पर्धी उमेदवार छन् । रास्वपाबाहेकका पार्टीहरुले यो क्षेत्रका सबै ठाउँमा आफ्नो क्षेत्रीय, नगर, गाउँ र चुनावी प्रचार समितिको कार्यालय खोलिसकेका छन् । एमाले उमेदवार बगडियाले भने,‘‘क्षेत्रीय, नगर र गाउँस्तरीय प्रचार समितिबाट नै हामी चुनावी प्रचार तथा घरदैलो अभियान संचालन गरिरहेका छौं ।’’
सोमबार, जेठ १८, २०८३
सोमबार, जेठ १८, २०८३
