तेहरान । हालैका सैन्य आक्रमणबाट क्षतिग्रस्त परमाणु संरचनाको निरीक्षण गर्दै इरानी राष्ट्रपति मसूद पेजेश्कियानले ती केन्द्रहरूलाई पहिलेभन्दा अझ सशक्त रूपमा पुनर्निर्माण गर्ने घोषणा गरेका छन्।
आइतबार प्रमुख परमाणु स्थलगत क्षेत्रहरूको भ्रमणका क्रममा उनले भने, “भवनहरू भत्काउन सकिन्छ, तर इरानको इच्छाशक्ति भत्काउन सकिँदैन। हामी यी केन्द्रहरू अझ बलिया र सुरक्षित बनाएर पुनः सञ्चालनमा ल्याउँछौं।”
बिज्ञापन
राष्ट्रपति पेजेश्कियानले इरानको परमाणु कार्यक्रम केवल शान्तिपूर्ण प्रयोजनका लागि रहेको पुनः दोहोर्याउँदै देशले कहिल्यै पनि परमाणु हतियार विकास गर्ने लक्ष्य नराखेको दाबी गरे। तर, पश्चिमी देशहरूले भने इरानको उद्देश्यप्रति अझै शंका व्यक्त गर्दै आएका छन्।
गत जुनमा अमेरिकी राष्ट्रपति डोनाल्ड ट्रम्पले इरानको परमाणु संरचना ‘पूर्ण रूपमा ध्वस्त’ भएको दाबी गरेका थिए। तर वास्तविक क्षतिको विवरण अझै सार्वजनिक गरिएको छैन। ट्रम्पले ती केन्द्र पुनः सञ्चालनमा आए नयाँ सैन्य कारबाही गर्ने चेतावनीसमेत दिएका थिए।
यता, बहराइनमा आयोजित मनामा संवाद सम्मेलनमा ओमानका विदेशमन्त्री बद्र अलबुसैदीले तेहरान र वाशिङ्टनबीच वार्ता पुनः सुरु गर्न आग्रह गरेका छन्। इरानकी सरकारी प्रवक्ता फातिमा मोहजेरानीले पनि वार्ता पुनर्स्थापनासम्बन्धी सन्देश प्राप्त भएको पुष्टि गरेकी छन्।
यो वर्ष ओमानको मध्यस्थतामा इरान र अमेरिकाबीच पाँच चरणसम्म वार्ता सम्पन्न भएको थियो। छैटौँ चरण सुरु हुनु अघि इजरायली हवाई आक्रमणका कारण इरानका कैयौँ वैज्ञानिकको मृत्यु भएको बताइएको छ। त्यसपछि इरानले इजरायली सहरहरूमा ब्यालिस्टिक मिसाइल प्रहार गरी प्रतिकार गरेको थियो।
युद्धविरामपछि इरानले पुनर्निर्माण अभियानलाई राष्ट्रिय गौरवसँग जोड्दै आन्तरिक एकताको सन्देश दिइरहेको छ। राष्ट्रपति पेजेश्कियानका शब्दमा, “हाम्रो भविष्य दबाबले होइन, दृढ इच्छाशक्तिले तय गर्छ।”
बिहिबार, चैत्र १२, २०८२
बिहिबार, चैत्र १२, २०८२
