काठमाडौं । देशका केही स्थानमा सोमबार (कात्तिक १०) रातिदेखि वर्षा र हिमपात भइरहेको छ । पश्चिम नेपालमा हल्कादेखि मध्यम वर्षा र हिमपात भएको जल तथा मौसम विज्ञान विभागले जनाएको छ ।

यो साता वर्षा र हिमपातको थप सम्भावना छ । विशेष गरी पूर्वी नेपालमा वर्षाको सम्भावना बढी रहेको मौसमविद्ले बताएका छन् ।

बिज्ञापन

त्रिभुवन विश्वविद्यालयको जल तथा मौसम विज्ञान विषयका सहप्राध्यापक डा. विनोद पोखरेलले बिहीबारदेखि शुक्रबार (कात्तिक १३–१४)सम्म वर्षाको सम्भावना बढी रहेको उल्लेख गरेका छन् ।

“पश्चिमी नेपालबाट हिजो (सोमबार) रातिदेखि वर्षा सुरु भएको छ,” उनले मंगलबार बिहान सामाजिक सञ्जालमा लेखेका छन्, “भोलि पहाड र मध्य–पहाडमा वर्षा हुनेछ र बिहीबारदेखि शुक्रबारसम्म व्यापक हुनेछ ।”

हाल देशमा पश्चिमी वायुका साथै अरबसागरमा बनेको न्यूनचापीय प्रणालीको प्रभाव रहेको विभागअन्तर्गतको मौसम पूर्वानुमान महाशाखाले जनाएको छ । यसकै प्रभावले वर्षा र हिमपात भएको हो । काठमाडौंमा पनि छिटपुट वर्षा भएको छ । देशका केही स्थानमा यस दिन हल्कादेखि भारीसम्म वर्षा/ हिमपातको सम्भावना छ ।

×

❮

❯