विराटनगर । नजिकिँदै गरेको बडादशैँको अवसर पारेर विराटनगरमा पाँचौँ संस्करणको ‘विराट सडक महोत्सव–२०८२’ हुने भएको छ। मन्जिना मुभिज क्रियसन विराटनगरको आयोजनामा हुने यो भव्य महोत्सव आगामी असोज ६ गतेदेखि ११ गतेसम्म हिमालय रोडमा आयोजना गरिनेछ।

आयोजकले पत्रकार सम्मेलनमार्फत दिएको जानकारी अनुसार यस वर्षको महोत्सव अझ बढी आकर्षक र बृहत् हुने छ। मन्जिना मुभिज क्रियसनका निर्देशक जतिन ताम्राकारले महोत्सवमा विभिन्न जातजातिका मौलिक परिकारसहित स्थानीय र राष्ट्रिय स्तरका खानाका २५ स्टल रहने बताए। यसले आगन्तुकलाई स्वादिलो र विविधतापूर्ण खाद्य अनुभव दिलाउने विश्वास गरिएको छ।

बिज्ञापन

सडक महोत्सवले विराटनगरको सांस्कृतिक, सामाजिक र आर्थिक गतिविधिलाई प्रोत्साहन गर्ने उद्देश्य राखिएको आयोजकले जनाएको छ। महोत्सव अवधिभर स्थानीय तथा राष्ट्रिय कलाकारहरूको कला–संगीत प्रस्तुति, मनोरञ्जनात्मक कार्यक्रम र अन्य आकर्षक गतिविधिहरू प्रस्तुत गरिनेछन्।

महोत्सवमा विराटनगरवासी मात्र नभई आसपासका बासिन्दा र भारतका जोगवनी, कटिहारलगायत शहरका पाहुनाको समेत उत्साहजनक सहभागिता हुने अपेक्षा गरिएको छ। यसले स्थानीय व्यवसाय प्रवर्द्धन र पर्यटन विकासमा महत्वपूर्ण योगदान पुर्‍याउने आयोजकको विश्वास छ।

विगतका संस्करणजस्तै यसपटक पनि महोत्सवले विराटनगरको सामाजिक सद्भाव र सांस्कृतिक विविधतालाई झल्काउँदै सबैलाई एकै ठाउँमा ल्याउनेछ। असोज ६ देखि ११ गतेसम्म हिमालय रोड स्वादिष्ट खाना, कला, संस्कृति र मनोरञ्जनको संगम बनेर झल्किनेछ।

×

❮

❯