दमक । पूर्व राजा ज्ञानेन्द्र शाह दुई दिनदेखि झापाको दमकमा छन् । उनको करिव एकमहिना लामो दमक बसाईको सेडुललाई लिएर राजनीतिक रुपमा विभिन्न टिका टिप्पणी पनि हुन थालेको छ ।
सोमबार दिउँसो १२ः४५ बजे बुद्ध एयरको बीएचए ९५५ को नियमित उडानमार्फत् पूर्व राजा ज्ञानेन्द्र शाह, पूर्वरानी कोमल शाह, छोरी प्रेरणा शाहलगायत ६ सदस्यीय टोली झापा आइपुगेका हुन् । चन्द्रगढी विमानस्थलमा स्वागत पश्चात उनीहरु दमक –९ स्थित हिमालयन महालक्ष्मी टि इस्टेटस्थित मिनी दरबारमा बसेका छन् ।
बिज्ञापन
पूर्व राजालाई भेट्न झापाबाहेक मोरड.,सुनसरी र धनकुटालगायत जिल्लाबाट पनि राजा समर्थक र राप्रपाका नेता कार्यकर्ताहरु आउने क्रम चलिरहेको सुरक्षा संयन्त्रले जनाएको छ ।
प्रधानमन्त्री केपी शर्मा ओलीको गृहनगर दमक नगरपालिकामा रहेको चियाबगान भित्रको आफ्नो ’मिनी दरबार’ मा उनी बसेका छन् । बर्सेनीजसो हिउँदमा राजधानीको जाडो छल्न आउने उनको झापा यात्रा २०५८ को दरबार हत्याकाण्डपछि पातलिएको थियो । राजपाठ आफ्नो काँधमा नआउञ्जेल उनी त्यसअघि हरेक वर्ष हिउँदमा एक महिना लामो बसाईका साथ दमक आउने गरेका थिए ।
यो पटक राजनीतिक उत्तार चढाव बढिरहेका बेला राजा फर्काउने अभियान सडकदेखि सदनसम्म चुलिएको छ । झापालाई राजा समर्थक र राप्रपाले आफ्नो पकट क्षेत्रको रुपमा लिँदै आएको छ । यस अर्थमा पनि पूर्वराजाको दमक बसाई अवधि लम्बिने अनुमान जिल्लाका सुरक्षा अधिकारीहरको छ ।
’हामीलाई प्राप्त सूचना अनुसार एक महिना लामो बसाई हुने बुझिएको छ’, जिल्लाका एक प्रहरी अधिकृतले भने ’राजावादी कार्यकर्तासँग भेटघाट गर्ने बुझिएको छ ।’
पूर्वराजा ज्ञानेन्द्रको झापा ’कनेक्सन’ को मुख्य आधार चाहिँ यहाँ रहेको ’हिमालय –महालक्ष्मी गुडरिक’ चिया बगान हो, जसमा उनको स्वामित्व छ ।
दमकको ४ र ९ नम्बर वडामा सात सय बिघा जमिनभन्दा बढी क्षेत्रफलमा फैलिएको चिया बगान २०१८ सालमा उनका बाबु महेन्द्रले स्थापना गरेका हुन् ।
महेन्द्रले भाई हिमालयको नाममा स्थापना गरेको यो बगानभित्र एउटा मिनी दरबार छ । राजमार्गभन्दा १ किलोमिटर दक्षिणमा रहेको दरबारमा उनी यसअघि पनि पटक पटक आएर लामो समय बस्ने गरेका थिए ।
जस्तापातको छाना भएको र वरिपरिबाट अग्लो पर्खालले घेरिएको यो दुई तले दरबारमा स्थानीयलाई सधैँ प्रवेश निषेध छ । ज्ञानेन्द्रका परिवारका सदस्यहरु जाडो छल्न यहाँ आउने गरेको कर्मचारी बताउँछन् ।
बँदेल, हरिण लगायतका जनावर पालिएको दरबारमा पानीको फोहोरा र दर्जनौं कुकुर बस्ने घर पनि अलग्गै छ । सखुवाको जंगल पनि नजिकै भएको गुडरिक दरबार सधैं सुरक्षागार्डहरुको जिम्मामा रहने गरेको छ भने सुरक्षाफौज पनि यहाँ खटिएको हुन्छ ।
मंगलबार, भाद्र १०, २०८२
मंगलबार, भाद्र १०, २०८२
