विराटनगर । कोसी प्रदेश प्रहरी कार्यालयको भवनअगाडि फहराइएको नेपालको राष्ट्रिय झन्डा च्यातिएको अवस्थामा देखिएको छ।
राष्ट्रको गरिमा र सम्मानको प्रतीक झन्डा यसरी क्षतविक्षत अवस्थामा फहराइँदा समेत सम्बन्धित निकायले बेवास्ता गरेको देखिन्छ।
बिज्ञापन
सधैँ प्रहरी प्रमुख र उच्च अधिकारीहरूको आवागमन हुने सो कार्यालयको अगाडि च्यातिएको झन्डा फहरिनु गम्भीर लापरबाही हो । त्यत्तिकै नजिकै रहेको नेपाल प्रहरीको झन्डा समेत रङ उडेर जीर्ण अवस्थामा पुगेको छ।
स्रोतका अनुसार कार्यालयमा दैनिक झन्डा उठाउने र झार्ने प्रक्रिया अपनाइन्छ, तर च्यातिएको झन्डा अझैसम्म फेर्न पहल गरिएको छैन। यो दृश्य नदेखिएको भन्न सकिन्न, तर देखेर पनि अनदेखा गरिएको आशंका गरिएको छ।
राष्ट्रिय झन्डा मुलुकको सम्मान, एकता र सार्वभौमिकताको प्रतीक पनि हाे । प्रहरी प्रशासन स्वयं अनुशासन र मर्यादाको उदाहरण प्रस्तुत गर्ने संस्थाको रूपमा चिनिन्छ। त्यही संस्थाको कार्यालयमा राष्ट्रिय झन्डाको यति ठूलो बेवास्ता भएकाे हाे ।
राष्ट्रिय झन्डा प्रयोग सम्बन्धी सरकारको कार्यविधि छ । यसले झन्डाकाे महत्व दर्शाउने गरीमात्र यसको प्रयोग गर्न पाउने व्यवस्था गरेको छ । यस सम्बन्धी कार्यविधि २०६९ ले नेपालको राष्ट्रियता झल्काउने प्रतीकका रुपमा लिएको छ । तर, कोसी प्रदेश प्रहरी कार्यालय विराटनगरको कार्यालय अगाडि फहराई रहेको झन्डाले भने प्रहरीकाे निकायलाइ नै गिज्याइ रहेकाे जस्ताे भएकाे देखिन्छ ।
झण्डा पुरानो भई रंग उडेको छ । खुईलिएको झण्डा ठाउँठाउँमा च्यातिएको पनि छ । तर, यसतर्फ प्रहरी कार्यालयका प्रमुखको समेत ध्यान नगएको पाइएको छ ।
प्रदेशकै शान्ति सुव्यवस्था कायम गर्न स्थापित कार्यालयमै झन्डाकाे यो टिठलाग्दो अवस्थाले जो कोहीको ध्यान खिच्छ ।
राष्ट्रिय झन्डा सम्बन्धी कार्यविधिमा राष्ट्रिय झण्डाको अपमान हुने किसिमको कुनै पनि कार्य गर्न वा गराउन नपाउने व्यवस्था छ ।
उल्टो (चन्द्रमा तल पर्ने गरी) राख्न, च्यात्न, जलाउन, फ्याँक्न, कुनै सामान पोको पार्न, व्यापारिक प्रयोजनका लागि विज्ञापनको उद्देश्यले राष्ट्रिय झण्डाको दुरुपयोग गर्न पाइँदैन ।
मंगलबार, साउन २०, २०८२
मंगलबार, साउन २०, २०८२
