नयाँ दिल्ली । भारतको राजधानी नयाँ दिल्लीमा मुख्य निर्वाचन आयुक्त ज्ञानेश कुमारको राजीनामा माग गर्दै भएको प्रदर्शनका क्रममा प्रहरीले १०० भन्दा बढी प्रदर्शनकारीलाई नियन्त्रणमा लिएको छ। आम आदमी पार्टी (आप), युवा कांग्रेस, विद्यार्थी संगठन तथा नागरिक समाजका विभिन्न समूहले जन्तर–मन्तर क्षेत्रमा प्रदर्शन गर्ने प्रयास गरेका थिए।
प्रदर्शनकारीहरूले निर्वाचन आयोगको कार्यशैली तथा स्पेसल इन्टेन्सिभ रिभिजन (एसआईआर) अन्तर्गत भइरहेको मतदाता नामावली पुनरावलोकन प्रक्रियामाथि प्रश्न उठाएका छन्। उनीहरूले योग्य मतदाताको नाम सूचीबाट हटाइएको आरोप लगाउँदै मुख्य निर्वाचन आयुक्त कुमारको राजीनामा माग गरेका हुन्।
विज्ञापन
निर्वाचन आयोगले भने एसआईआरको उद्देश्य मतदाता सूचीमा रहेका दोहोरो, अयोग्य तथा अन्य त्रुटिपूर्ण नाम पहिचान गरी हटाउनु रहेको बताउँदै आएको छ। आयोगले प्रक्रिया निर्धारित कानुनी व्यवस्थाअनुसार भइरहेको दाबी गरेको छ।
शुक्रबार बिहान प्रदर्शनकारीहरू जन्तर–मन्तरतर्फ भेला हुन थालेपछि प्रहरीले क्षेत्रमा सुरक्षा व्यवस्था कडा बनाएको थियो। दिल्ली प्रहरीले प्रदर्शनका लागि अनुमति नदिएको तथा नयाँ दिल्ली जिल्लामा सार्वजनिक जमघट नियन्त्रणसम्बन्धी आदेश लागू गरिएको जनाएको छ। त्यसका बाबजुद विभिन्न राजनीतिक तथा नागरिक समूहका कार्यकर्ताहरू प्रदर्शनस्थल पुग्ने प्रयास गरेका थिए।
प्रहरीले जन्तर–मन्तर क्षेत्र खाली गराउने क्रममा १०० भन्दा बढी प्रदर्शनकारीलाई नियन्त्रणमा लिएको आयोजक तथा स्थानीय सञ्चारमाध्यमले जनाएका छन्। नियन्त्रणमा पर्नेमा आप कार्यकर्ता, युवा कांग्रेसका सदस्य तथा वामपन्थी विद्यार्थी संगठनका कार्यकर्ता रहेका छन्। आप दिल्लीका अध्यक्ष सौरभ भारद्वाजलाई समेत प्रहरीले नियन्त्रणमा लिएको बताइएको छ।
प्रदर्शनकारीहरूले जन्तर–मन्तर रोड हुँदै प्रदर्शनस्थलतर्फ अघि बढ्ने प्रयास गरेपछि प्रहरीले उनीहरूलाई पटक–पटक रोकेको थियो। कनाट प्लेस, जनपथलगायत आसपासका क्षेत्रमा पनि केही समूहले प्रदर्शन जारी राख्दै ‘राजीनामा दे’ लगायतका नारा लगाएका थिए।
प्रदर्शनलाई ध्यानमा राख्दै दिल्ली प्रहरीले ठूलो संख्यामा सुरक्षाकर्मी परिचालन गरेको थियो। जन्तर–मन्तर जाने प्रमुख सडकमा ब्यारेकेड राखिनुका साथै सम्भावित भीड नियन्त्रणका लागि थप प्रहरी तथा अर्धसैनिक बल परिचालन गरिएको थियो। प्रहरीले ड्रोनमार्फत समेत निगरानी गरेको जनाएको छ।
सुरक्षा व्यवस्थाका कारण राजधानीको यातायात व्यवस्थासमेत प्रभावित भएको थियो। संसद् मार्ग, जनपथ, कनाट प्लेसलगायत क्षेत्रमा आवागमनमा प्रतिबन्ध तथा वैकल्पिक व्यवस्था गरिएको थियो।
११ मेट्रो स्टेसन बन्द
प्रदर्शनका कारण दिल्ली मेट्रो सेवासमेत प्रभावित भएको छ। सुरक्षाको कारण राजधानीका ११ वटा मेट्रो स्टेसनमा प्रवेश तथा बाहिरिने द्वार बन्द गरिएको बताइएको छ। राजीव चौक, सेन्ट्रल सेक्रेटेरियट, पटेल चौक र नयाँ दिल्लीसहितका महत्वपूर्ण स्टेसन प्रभावित भएका छन्। केही स्टेसनमा भने इन्टरचेन्ज सुविधा सञ्चालनमा राखिएको जनाइएको छ।
यसैबीच राष्ट्रिय जनता दल (आरजेडी)का सांसद मनोज झाले प्रदर्शनमाथि लगाइएको प्रतिबन्धको आलोचना गरेका छन्। उनले महात्मा गान्धी जयन्तीका दिन विरोध प्रदर्शन गर्न रोक लगाउनु उचित नभएको बताएका छन्।
प्रदर्शनमा सहभागी राजनीतिक दल तथा नागरिक समूहले निर्वाचन आयोगको स्वतन्त्रता, मतदाता नामावलीको पारदर्शिता र निर्वाचन प्रक्रियाप्रति जवाफदेहिताको माग गरेका छन्।
यही विषयलाई लिएर भारतका अन्य सहरमा पनि विरोध कार्यक्रम आयोजना गरिएको छ। दिल्लीको जन्तर–मन्तरसँगै मुम्बईको शिवाजी पार्क आसपासमा समेत प्रदर्शनको आह्वान गरिएको थियो।
एसआईआर प्रक्रियालाई लिएर भारतमा सत्तापक्ष र विपक्षी दलबीच विवाद बढ्दै गएको छ। विपक्षी दल तथा प्रदर्शनकारीहरूले प्रक्रियाबाट योग्य मतदाता प्रभावित हुन सक्ने आशंका व्यक्त गरेका छन्। निर्वाचन आयोग र भारतीय जनता पार्टीले भने अनियमितता तथा राजनीतिक पक्षपातको आरोप अस्वीकार गर्दै मतदाता सूची शुद्धीकरणका लागि प्रक्रिया आवश्यक रहेको बताउँदै आएका छन्।
शुक्रबार, असोज १६, २०८३
शुक्रबार, असोज १६, २०८३
