काभ्रेपलाञ्चोक । अविरल वर्षाका कारण अरनिको राजमार्गअन्तर्गत सिन्धुपाल्चोकको कोदारी (इको क्षेत्र) मा सडक भासिँदा नेपाल-चीन जोड्ने प्रमुख व्यापारिक तातोपानी नाका सोमबारदेखि पुनः पूर्ण रूपमा ठप्प भएको छ।

भोटेकोसी गाउँपालिका-२ स्थित इको भन्ने स्थानमा आइतबार साँझदेखि परेको लगातारको वर्षाले गर्दा करिब दुई मिटर सडक तल धसिएको हो। सडक भासिएसँगै सो क्षेत्रमा सवारी आवागमन पूर्ण रूपमा रोकिएको छ।

बिज्ञापन

इलाका प्रहरी कार्यालय कोदारीका प्रमुख, प्रहरी निरीक्षक केशव केसीका अनुसार सडक भासिएको स्थानमा माथिबाट निरन्तर लेदो माटो बगिरहेको र वर्षा नरोकिएका कारण मर्मत कार्यमा निकै कठिनाइ भइरहेको छ। चरिकोट सडक डिभिजन कार्यालयले सडकमा गिट्टी र माटो हालेर बाटो खुलाउने प्रयास गरे पनि लगातारको झरीले गर्दा काम प्रभावित भएको प्रहरीले जनाएको छ।

हालको अवस्था: ठूला सवारी साधन पूर्ण रूपमा ठप्प भए पनि केही साना ‘फोर-ह्विल’ गाडी र मोटरसाइकललाई भने सुरक्षाकर्मी र स्थानीयको सहयोगमा ठेलेर पहिरो कटाइएको छ।

सडक अवरुद्ध भएपछि व्यापारिक गतिविधि ठप्प भएको छ। चीनबाट भन्सार प्रक्रिया पूरा गरी नेपालतर्फ सामान बोकेर आउँदै गरेका र नेपालबाट चीनतर्फ प्रस्थान गर्न लागेका थुप्रै मालवाहक कन्टेनरहरू बीच बाटोमै रोकिएका छन्।

गत वर्ष पनि वर्षायाममा इको पहिरो क्षेत्रमा सडक भासिने र पहिरो जाने समस्याले गर्दा यो नाका पटक-पटक बन्द हुने गरेको थियो। भौगोलिक संवेदनशीलताका कारण यसपटक पनि वर्षा सुरु हुनासाथ नाका जोड्ने मुख्य सडक क्षत-विक्षत बनेको हो।

×

❮

❯