काठमाडौं । प्रधानमन्त्री सुशीला कार्कीको राजीनामा माग गर्दै ‘जेनजी’ अभियानका अगुवा मिराज ढुंगानाको समूहले बुधबार बालुवाटारस्थित प्रधानमन्त्री निवास बाहिर प्रदर्शन गरेको छ।

सरकारले ‘जेनजी’ आन्दोलनको भावना विपरीत कदम चालेको आरोप लगाउँदै उनीहरूले प्रधानमन्त्रीले पद त्याग्नुपर्ने माग राखेका थिए। प्रदर्शनका क्रममा सहभागीहरूले “प्रधानमन्त्री राजीनामा दे”, “जेनजीका माग पूरा गर”, “दोषीलाई कारबाही गर” जस्ता प्लेकार्डसहित नाराबाजी गरेका थिए।

बिज्ञापन

प्रधानमन्त्री निवासको गेटबाहिर भएको प्रदर्शनमा प्रहरीले हस्तक्षेप गरी उनीहरूलाई हटाएको थियो। सो मौका ढुंगानाले सरकार चुनावमा मात्र केन्द्रित रहेको र ‘जेनजी’ आन्दोलनको मूल उद्देश्यबाट विमुख भएको आरोप लगाए।

समूहले अघि सारेको ९ बुँदे माग सम्बोधन नभएसम्म आन्दोलन जारी रहने बताएका छन्। ढुंगानाका अनुसार वर्तमान अवस्थामा हुने निर्वाचनले देशलाई समाधान नदिने भएकाले ‘जेनजी’ विद्रोहलाई तत्काल राजनीतिक आन्दोलनको रूपमा मान्यता दिनुपर्छ। साथै, सहिद परिवार र घाइतेहरूको उचित व्यवस्थापन गर्नुपर्ने माग पनि दोहोर्याइएको छ।

‘जेनजी’ आन्दोलनका क्रममा भएको दमन तथा आगजनीमा संलग्नलाई कारबाही गर्नुपर्ने उनीहरूको अर्को माग हो। यसअघि मंगलबार पनि सो समूहले सिंहदरबार क्षेत्र वरपर प्रदर्शन गरेको थियो। उनीहरूको भनाइमा, आफ्ना माग प्रधानमन्त्रीलाई बुझाउने प्रयास गर्दा प्रधानमन्त्रीले समय नदिएको आरोप समेत लगाइएको छ।

×

❮

❯